Back to School .. هنا الزاهد كانت بتعتبر المدرسة فُسحة وبتحب المذاكرة
أيام قليلة وينطلق الموسم الدراسي للعام الجديد، وتحمل تلك الأيام العديد من الذكريات لعدد من النجوم، الذين تحدثوا في مناسبات كثيرة من قبل عن ذكرياتهم في المدرسة، ويستعرض خبر أبيض من خلال ملف Back to School، أبرز تصريحات النجوم التي كشفوا خلالها عن المواقف الكوميدية التي مازالت عالقة في أذهانهم حتى الآن.
ذكريات أول يوم مدرسة
وقالت هنا الزاهد عن ذكرياتها مع أول يوم في المدرسة : فاكرة أول يوم مدرسة صحيت بدرى جدا قبل ماما، وكنت فرحانة جداً إني هروح مدرستي، ولبست لبسي الجديد بسرعة لدرجة إنى لبسته غلط، وكنت حاسة إنى رايحة فسحة، على عكس أختى فرح اللي كانت بترفض تدخل الفصل.
وتابعت : كنت أحب الذهاب الي المدرسة ومذاكرة كل المواد، وكنت اجتماعية مع زملائي، وأحب أن أتقابل معهم كل يوم لكي نتحدث ونلعب سوياً.
قصة ميس فريدة
وأضافت : ماما كانت بتحب الدلع وتحب تلبسنا هدوم حلوة، لكن مديرة المرسة ميس فريدة ماكنتش بترضى بالحال المايل، وكنا في آخر يوم مدرسة بتحب تلبسنا على مزاجها واختارت لنا هدوم وقالت لي ألبسها أنا وأختي وفرح، وعلي الهدوم حزام شاكيرا اللي مليان ترتر ورغم إني كنت بكرهه لكني كنت بلبسه بالإجبار.
وأكلمت : روحت المدرسة اليوم ده وكنت عارفة إني هتبهدل من المديرة لأننا كنا لابسين أنا وأختي كتف وكتف، ولما شافتني قالت لي تعالي ولبستنا أنا وفرح تيشرت طويل، وقالت : عقاباً ليكم هتفضلوا طول اليوم كده، وأنا قولتلها والله دي ماما اللي خليتني ألبس كده، راحت قالت : كلمولي مامتهم، واتصلوا بيها وقالولها ابعتي ليهم أطقم تانية، فبعتت لنا طقم كب بدون أكتاف أصلاً، وقتها صعبنا على ميس فريدة، لأني قولتلها والله أنا ماليش دعوة هي اللي اختارت، فقالتلهم خلاص سيبوهم، أنا ليا كلام تاني مع مامتهم.
واختتمت هنا، قائلة : ماما طول عمرها ماكنتش بتجبرنا على المذاكرة، وكانت دايماً تقولنا وقت النادي للنادي ووقت المذاكرة تذاكروا، لكن أنا كنت بحب أعند معاها وأذاكر في الوقت اللي أنا عايزاه، لأنها ماكنتش بتطلب مننا إننا نطلع من الأوائل، أهم حاجة ننجح وخلاص.
أعمال تنتظرها هنا الزاهد
وتنتظر هنا الزاهد الفترة المقبلة عرض مسلسلها الجديد إقامة جبرية، والذي انتهت من تصويره منذ فترة طويلة، ومن المقرر عرضه قريبًا على منصة WATCH IT، ويشاركها في بطولته صابرين، محمد الشرنوبي، ثراء جبيل، محمود البزاوي، وعايدة رياض، والمسلسل من تأليف أحمد عادل وإخراج أحمد سمير فرج.
كما تنتظر هنا عرض فيلم بضع ساعات في يوم ما، الذي يجمعها بـ هشام ماجد، ويدور في إطار اجتماعي رومانسي، مأخوذ عن رواية تحمل نفس الاسم لـ محمد صادق، ويشارك في بطولته مي عمر، أحمد السعدني، محمد سلام، محمد الشرنوبي، أسماء جلال، ومايان السيد، والفيلم من تأليف محمد صادق وإخراج عثمان أبو لبن.
