إسعاد يونس : اشتغلت في كانتين المدرسة علشان أعتمد على نفسي وسمير غانم وعادل إمام سبب دخولي الفن
حلّت إسعاد يونس ضيفة على برنامج AB talks مع أنس بوخش، المذاع عبر قناته على يوتيوب، وتحدثت عن عدد من تفاصيل حياتها، ودخولها الفن، وأثر وفاة والدها وهي في سن صغيرة على شخصيتها.
طفولة إسعاد يونس
تحدثت إسعاد يونس عن طفولتها، وقالت : كنت لوحدي لأن أخواتي كانوا قريبين من بعض علشان سنهم وكنت أنا الكبيرة، وكنت مسؤولة عنهم بسبب وفاة والدي، بقيت شريكة في إدارة شؤون البيت مع والدتي، وكنت بمارس كل حياتي لوحدي.
وتابعت : اشتغلت وأنا عندي 10 سنين، مكنتش بحب أخد مصروف، كنت عايزة يكون ليا دخل، قلت لوالدي هفهرس المكتبة وهأجر منها للجيران، وعملت كده فعلا، وبقيت أطلع أعرض الكتب على الجيران، وفي ناس فعلا كانت بتاخد، وناس لا، بعد كده اشتغلت في كانتين المدرسة.
وفاة والدها
وأضافت : والدي توفى وإحنا مستورين، عندنا دخل وعربيتين وشقة، ولكن ليلة الوفاة روحنا بـ 11 قرش، وبعدها ناس كتير قاطعت ماما علشان الغيرة، كانوا خايفين منها على أزواجهم لأنها كانت صغيرة وجميلة.
دخول إسعاد الفن
وعن دخولها الفن، تابعت : لما اتجوزت نبيل الهجرسي كنت بروح المسرح معاه وخدت خبرة، وكانت عيني بتذاكر، بالتالي كونت صداقة مع زمايله، الزعيم وسمير غانم وصلاح السعدني وغيرهم، بعدها اشتغلت في الإذاعة ومنها عملت حوارات معاهم وعلاقتي بهم زادت، فجأة سمير غانم جالي يعرض عليا أشارك في مسلسل، وداني للمخرح محمد أباظة، ووافق عليا فورا، فخرجنا من المسلسل مشهورين.
طلب البطولة مع الزعيم
وتابعت : بعدها أنا وعادل إمام وزوجته كنا أصحاب وتفهمنا بعض، وطلبت منه أعمل بطولة معاه، وجابني في شعبان تحت الصفر، كذلك عبدالوهاب مطاوع له فضل كبير عليا لأن بسببه كتبت في مجلة الشباب وفضلت 14 سنة، واتعلمت منه كتير، سيد مكاوي وصلاح جاهين ناس كتير لهم فضل عليا.
أحدث أعمال إسعاد يونس
من ناحية أخرى، تواصل إسعاد يونس تصوير مسلسلها الجديد تيتا زوزو، وتقدم خلاله شخصية وكيل وزارة الزراعة ولديها ابنان متزوجان ولديها أحفاد، حيث تمر عائلتها بعدة مشاكل وأزمات تضطرها إلى حل تلك القضايا لإنقاذ عائلتها.
ويشارك إسعاد يونس في البطولة مصطفى غريب، إسلام إبراهيم، ندى موسى، محمد كيلاني، إيناس كامل، حمزة العيلي، نور محمود، محمود البزاوي، وإيمان يوسف، وهو من تأليف محمد عبدالعزيز وإخراج شيرين عادل.
