محمد هنيدي : عانيت 15 سنة في بداية مشواري واترشحت لـ دور علاء مرسي في ليالي الحلمية
تحدث محمد هنيدي عن معاناته في بداية مشواره الفني وحياته قبل الشهرة وحكاية ترشيحع لدور علاء مرسي في مسلسل ليالي الحلمية، وذلك خلال لقائه مع أحمد سعد وعمرو سعد في برنامجهما بيت السعد المُذاع على MBC 1.
معاناة هنيدي 15 سنة
وقال محمد هنيدي : كنت من زمان بحلم إني أكون ممثل مشهور ولكن بحدود ومكنتش متوقع المكانة اللي وصلتلها خالص، ودايمًا ربنا بيبهر العبد وبيديك أكتر ما بتتمنى.
وأضاف: كان فيه معاناة 15 سنة قبل فيلم إسماعيلية رايح جاي، واترفضت كتير في أكتر من شغل، وفي مرة اشتغلت عمل وصورت يوم وبعدها مشيت لأني مكنتش مقتنع بالدور.
وتابع : قبل تصوير مسلسل البخيل وأنا، اترشحت لدور توفيق البدري في مسلسل ليالي الحلمية اللي عمله علاء مرسي وكنت حابب أعمله قوي، ولكن ماشتركتش فيه لأني كنت حابب أبدأ بشكل معين لحد ما ربنا كرمني بمسلسل البخيل وأنا.
أول عربية بتكييف
كما روى هنيدي موقف كوميدي عند شراءه سيارة بتكييف في عز الحر، وقال : كان عندي عربية مكنش فيها تكييف وكنت شغال على مسرحية آلابندا والدنيا كانت حر، ووقتها جالي سمير حبيب وقالي هنعمل مسلسل تيمون وبومبا 80 حلقة وقالي هديك 10 آلاف جنيه.
وأضاف : قولتله موافق بس أنا عندي شرط هاتلي سرير هنا وهخلص الحلقات كلها في 10 أيام بدل من شهرين، وكمان أخد الـ 10 الاف جنيه دلوقتي علشان أجيب عربية بتكييف، وروحت جيبت العربية وركنتها خلصت المسلسل في 10 أيام وجالي شهادة من ديزني أني صورت في وقت قياسي.
واستكمل : بعد ما خلصت المسلسل كلمني المنتج عصام إمام علشان عندنا عرض لمسرحية ألابندا في مسرح الفردوس، وقولتله فيه مفاجأة معايا وفجأة أنا ماشي بالعربية في شارع الهرم ورايح المسرح فجأة عربية خبطتني من اليمين وواحدة من الشمال وكملت بالعربية مفعصة، ووقتها عصام إمام قعد يلطم لما شاف العربية.
أفلام منتظرة لـ محمد هنيدي
وفي سياق مختلف، بدأ محمد هنيدى التحضيرات والاستعدادات لفيلمه الجديد الإسترليني الذي يبدأ تصويره خلال الفترة المقبلة في السعودية، ويشارك في الفيلم نيللي كريم التي تقدم دور البطولة أمام هنيدي والممثل السعودي إبراهيم الحجاج وعدة أسماء أخرى سيتم التعاقد معها خلال الفترة القادمة.
وينتظر محمد هنيدي أيضًا عرض فيلمه الجديد الجواهرجي قريبًا، ويجمع الفيلم بين هنيدي ومنى زكي بعد غياب 26 عامًا عندما اجتمعا سويًا في بطولة فيلم صعيدي في الجامعة الأمريكية، وتعتزم بيج تايم تقديم جزء ثان منه.
