رامي جمال : ناريمان جات تاخد مني لحن فاتجوزتها وأغنية أوعديني كانت ليها
حل رامي جمال وزوجته ناريمان، ضيوفًا على برنامج معكم التي تقدمه الإعلامية منى الشاذلي، وكشفا خلاله عن تفاصيل قصة حبهما وزواجهما خلال أسبوع، فضلا عن أحدث أغانيه وعمله كملحن مع كبار المطربين في الوطن العربي.
رامي جمال: اتجوزت ناريمان في أسبوع
وتحدث رامي جمال عن قصة حبه مع ناريمان، وقال: اتجوزت ناريمان في أسبوع ولحد دلوقتي هي مش مصدقة أن ده حصل، وأول مرة شوفتها كانت جاية تاخد لحن ووقتها عجبتني طريقة كلامها وحسيت إن روحى تآلفت معاها.
وتابع: لما شوفتها قولت آه لو عندى حد ممكن أغنيله لوحده، وأكيد ده مش هيزعل جمهوري، وقبل مانتجوز اتفقت معاها أنها هتبعد عن الغناء، وده لأن الغناء مش شغلتها.
ناريمان: مندمتش أني بعدت عن الغناء
وردت عليه ناريمان خلال الحلقة، قائلة: اتعرفت على رامي في حفلة وكان نفسي أغني لحن من ألحانه، خاصة أنه كان ملحن شاطر وأغانيه ناجحة مثل أغنية سيبه لـ مي سليم، وكان بيلمحلي أنه معجب بيا بس كنت حساه بيضحك عليا، ولما قررنا نتجوز رامي اتفق معايا إنى أبطل غناء، وقتها حسيت أني مرتاحة مع القرار ومش ندمانة، ومش حاسة أني بعدت عن المجال، لأنه بياخد رأيي في أغانيه وألحانه قبل ما بتنزل.
رامي جمال: أوعديني كانت لناريمان
كما تحدث رامي جمال عن أعماله الفنية، وقال : أغنية أوعديني معمولة لناريمان وغنيتهالها، ودي أول مرة تطلع معايا في لقاء علشان كده غينتهالها تاني، أما بالنسبة لأغنية سقف مكونتش متوقع أنها تنجح كده وأني أقدر أجمع كل النجوم دول يغنوها، وكمان وقت الكورونا ساعد في نجاح الأغنية والناس مكانش عندها حاجة غير أنها تسمعها.
أول لحن مع فضل شاكر
أما عن دخوله مجال الغناء عن طريق التلحين، قال رامي : أول لحن ليا كان لفضل شاكر، ووقتها جهزت 3 أغاني ورحت لـ فضل شاكر وأول ما سمع مني أغنية فين لياليك وافق عليها على طول وقالي دي بتاعتي، وغناها وخلصناها في نفس اليوم.
وتابع : اللي بيخوف أي فنان مني أنه ممكن ييجي في باله لو هو عنده حاجة حلوة هيدهالي ليه بدل ما ياخدها لنفسه، لكن أنا كصانع ألحان عندي متعة أني أنجح مع الفنانين، وأضاف مازحًا : هما المفروض يخافوا من ناريمان لأنها بتسخني أخد الأغاني لنفسي.
تعاون رامي جمال مع إليسا
وبالنسبة لتعاونه مع إليسا في ديو لها مع سعد لمجرد في أغنية من أول دقيقة، قال : هي أجدع وأشطر مطربة بلا منازع، وإليسا هي اللي طلبت مني ألحن الأغنية، ونجاح الأغنية دي سعيد بيها جدًا وعملت 500 مليون مشاهدة، وبحس أني نجحت وكامل النجاح ليا.
وأضاف: مكانش سهل أني أجمع صوت مطرب مع مطربة في سلم موسيقي واحد، والأغنية خدت مني 4 شهور شغل وشهرين تنفيذ.
