مصطفى أبو سريع : نفسي كلوت بك يرجع وأنا مش شكري سرحان
حقق مصطفى أبو سريع نجاحا كبيرا الفترة الماضية، من خلال مسلسل عمر أفندي، الذي قدم خلاله شخصية دياسطي، والذي كان يعيش في فترة الأربعينيات، خبر أبيض TV التقى بـ أبو سريع وكشف سبب ارتباط المشاهدين بالحقب الزمنية القديمة، وشارك في لعبة عمر أفندي مع خبر أبيض.
وعن شخصية عمر أفندي الحقيقية، قال : أنا معرفوش شخصياً، بس صاحب المحل نفسه كان يهودي، اسمه أوروزدي وكان عنده ولده شاطر اسمه عمر وكان واجهة المحل وبيتعامل مع الزباين بشكل كويس جداً، وهو كان معجب بطريقته في البيع، وجابه قاله يا عمر أنت طريقتك في البيع حلوة جداً، إيه رأيك تشاركني وأخلى المحل بإسمك، وفعلاً تمت الشراكة وبقى من أهم المحلات في مصر، وعدت السنين ومبقاش حد يعرف أوروزدي.
وعن الزمن الأجمل بين الأربيعينات والآن، قال : دايماً الناس بيقارنوا بين العصر اللي عايشين فيه واللي أقدم منه، وشايفين القديم أفضل حتى لو كان السنة اللي فاتت.
وبخصوص الفرق بين شخصية دياسطي وشكري سرحان في البوسطجي واصل: طبعا الفرق كبير جداً لأن ده الأستاذ، وأنا هنا بقدم مسلسل 15 حلقة والناس حبتني وصدقتني، وتلاقي الناس بيقولوا ده عمل الشخصية أحسن منه، يعني هما اللي قارنوا ونقدوا وفي الآخر شتموا وقالوا إيه اللي انت بتعمله ده.
شاهد الفيديو…
وعن زمن كلوت بيه، قال : الراجل ده ساهم في الطب، وكان أول واحد أدخل البنج مصر، وعمل لقاح الجدري، لكن شارع كلوت بيه ميرجعش، لأن الدعارة كانت مصرحة زمان فى الشارع ده، ولو ده رجع دلوقتي مع كلوت بيه في 2024 هيكون عليه تنمر كتير.
مصطفى أبو سريع في عمر أفندي
وحقق مصطفى أبو سريع مؤخراً نجاحا كبيراً من خلال عمر أفندي، درات أحداثه في إطار كوميدي فانتازي، خاض خلاله أحمد حاتم رحلة عبر الزمن من خلال سرداب يُعيده إلى عام 1942، ليجد اختلافًا كبيرًا بين حياته في العصر الحالي والزمن القديم، فيما قدمت آية سماحة شخصية الراقصة زيزي والتي تعيش قصة حب مع حاتم ضمن الأحداث، ولعبت رانيا يوسف دور دلال وهي صاحبة بنسيون ووالدة آية.
عمر أفندي مكون من 15 حلقة، ومن بطولة أحمد حاتم، آية سماحة، رانيا يوسف، مصطفى أبو سريع، محمود حافظ، أحمد سلطان، محمد عبدالعظيم، محمد رضوان، ميران عبدالوارث، إسماعيل فرغلي، وميمي جمال، والعمل من تأليف مصطفى حمدي وإخراج عبدالرحمن أبو غزالة.
