خيري بشارة : عمرو دياب تناول قصة حياته في آيس كريم في جليم وشيرين رضا كانت بتختار له ملابس الشخصية
![خيري بشارة - عمرو](/UploadCache/libfiles/3/9/600x338o/80.png)
تحدث المخرج خيري بشارة، لأول مرة عن سر اختياره لـ عمرو دياب منذ 32 عامًا لتقديم بطولة فيلم أيس كريم في جليم، وكواليس العمل معه وذلك خلال لقائه في برنامج سينماتك عبر إنستجرام.
تقديم عمرو دياب لقصة حياته
وقال خيري بشارة : على المستوى الأول الفيلم مسلي وموسيقي، وعلى المستوى الأعمق الفيلم بيتكلم عن العالم اللي بيتغير ومش في مصر بنختبر التغييرات اللي في العالم، وعلشان أمرر فيلم زي كدة سألت مين أكتر مطرب بتحبوه طلع عمرو دياب فاخترته.
وأضاف: طلبت من عمرو دياب أنه يكون على سجيته وكان فيه مشهد ماستر سين ليه لما كان في عيد ميلاده بيتكلم عن نفسه لما جه القاهرة وجه منين وهو رايح فين، وعن أحلامه اللي مش راضية تتحقق، فطلبت منه يتكلم عن تاريخه هو الشخصي، وهو بيمثل ومليحاولش يمثل.
تدخل شيرين رضا في اختيارات عمرو دياب
أما عن تدخل شيرين رضا في اختياراته وفي دور عمرو دياب، قال بشارة: هو كان نجم ومطيع جدًا وسلس وكان متجوز من شيرين رضا، وكنت بعمل ستايل ليه وبختار اللبس وبختار كل حاجة فرحت له البيت علشان أشوف اللبس اللي عنده علشان أختاره، فكانت شيرين عندها اقتراحات وهو رفض أنها تتدخل وقالها : سيبيه هو في دماغه حاجات وشايفني بطريقة معينة.
واستكمل حديثه قائلا: قلت له أنا ضد أني أحرج شيرين، وقولتله وقتها سيبها يا عمرو خليني أشوف الحاجات اللي هي شايفاها عليك.
المشهد الأقرب لقلب عمرو دياب
أما عن المشهد الأحب لعمرو دياب في الفيلم، تابع: فيه مشهد حاسس أن فيه توحد بيني وبينه، في شخصية علاء ولي الدين، هو دور صغير أوي وكنت حاسس أن علاء هو أنا، ده من المشاهد اللي ارتجلتها وكتبتها، لما عمرو دياب كل ما يضحك يستفز علاء ويقوله أن شكلي مش بيضحك.
قصة وأبطال أيس كريم في جليم
آيس كريم في جليم، تم إنتاجه عام 1992، بطولة عمرو دياب وعدد كبير من النجوم منهم : سيمون وعزت أبو عوف وحسين الإمام وأشرف عبد الباقي وجيهان فاضل وعلي حسنين، قصة وسيناريو محمد المنسى قنديل، حوار مدحت العدل، إخراج خيري بشارة.