يا خبر أبيض يكشف قائمة مسلسلات رمضان 2025 حتى الآن
كشفت ميرنا الغزناوي خلال برنامج يا خبر أبيض الذي تقدمه عبر خبر أبيض TV، عن القائمة المبدئية لمسلسلات رمضان 2025، وقالت : أول مسلسل تم الإستقرار على تنفيذه في رمضان 2025، هو إش إش بطولة مي عمر، وهيكون مختلف بالنسبة لعدد حلقاته اللي هتوصل لـ 30 حلقة، وهتكمل مي عمر تعاونها مع زوجها المخرج محمد سامي اللي شكلت معاه دويتو فني ناجح، وهو كمان بيتولى كتابة المسلسل مع مهاب طارق، وهيبدأ تصويره خلال شهر يوليو الجاري.
شاهد الحلقة كاملة …
وتابعت : أما أمينة خليل بترجع من خلال مسلسل بعنوان لام شمسية، اللي كانت هتقدمه مني زكي قبل كده، وكعادة أمينة هتقدم دور متفرد، خصوصاً إن العمل بيدور في إطار اجتماعي، وهتظهر فيه بدور مُدرسة في مدرسة دولية هتواجهها معوقات وأحداث غير متوقعة، مسلسل لام شمسية من تأليف مريم ناعوم، وإخراج كريم الشناوى.
عودة عمرو سعد
وأضافت : عمرو سعد هيرجع في رمضان 2025، بتجربة درامية بعنوان سيد الناس، هيتعاون فيها لأول مرة مع المخرج محمد سامي، وبيكتبه حالياً الكاتب الصحفي خالد صلاح، والمسلسل تم الانتهاء من كتابة عدد كبير من حلقاته خلال الفترة اللي فاتت، أما هنا الزاهد فهينتظرها الجمهور في رمضان 2025، من خلال مسلسل الجواز سم قاتل، اللي اتعاقدت عليه في الفترة الأخيرة، والمسلسل من إنتاج شركة ميديا هب للمنتج محمد السعدي، وفكرة وإخراج ياسمين أحمد كامل.
شاهد الفيديو …
وواصلت : أما محمد إمام فعنده رغبة يظهر في رمضان 2025 بمسلسل جديد، في أول خطوة بمسيرته إنه يقدم عملين متتالين في رمضان بدون فاصل زمني، وتحديداً بعد نجاحه في مسلسل كوبرا اللي اتعرض في 15 حلقة، وهو من إنتاج مها سليم، كمان ياسمين عبدالعزيز هترجع تاني لدراما مضان، وهتجدد تعاونها للمرة التالتة مع السيناريست عمرو محمود ياسين، والعمل هتدور أحداثه في إطار رومانسي.
مسلسلات الأجزاء
وأكملت : أما بالنسبة لمسلسلات الأجزاء فهي مكملة معانا في رمضان 2025، بداية من مسلسل العتاولة 2، واللي تصدر بطولته أحمد السقا بعد نجاحه الكبير في رمضان اللي فات، ومن المنتظر ظهورباسم سمرة بعد ما تعاقد رسمياً على الجزء الجديد.
واختتمت ميرنا : كمان مسلسل المداح 5 بطولة حماده هلال هيكون حاضر في رمضان، خصوصاً بعد نهاية الجزء الرابع اللي مهد بشكل واضح للجزء الجديد، أما مسلسل كامل العدد 3 لدينا الشربيني وشريف سلامة فتأكد عرضه في رمضان 2025، وهيكمل سلسلة نجاحه، بالإضافة لتوقيع هشام ماجد بطل مسلسل أشغال شقة على جزء تاني، هيشارك في بطولته أسماء جلال وكل من شيرين، ومصطفى غريب، ومحمد عبدالعظيم، وسلوى محمد علي.
