زوجة رامى صبرى تتصدر التريند بعد ردها على ويجز : انت مش موجود على الخريطة
خرجت شيري عادل، زوجة رامي صبري للرد على حديث ويجز عن زوجها خلال الساعات الماضية، حيث تصدرت شيري التريند بعد ردها على ويجز، وشاركت عبر إنستجرام، فيديو من لقاء زوجها الأخير، معلقة : ده جزء من الحلقة اللي رامي أتكلم فيها عن الراب، ومن هنا ورايح مش هسكت وهرد على أي حد يفكر يتكلم عنه تاني بأي طريقة مش عجباني.
رد زوجة رامي صبري على ويجز
وتابعت : أولاً رامي أتسال سؤال في برنامج ورد وعنده كل الصلاحية لأي رد أو إجابة على أي سؤال، يعني مفيش أي مانع يخلي رامى لما يتسأل سؤال مايجاوبش، ثانياً رامي صبري ده يا حضرت فنان من أهم الفنانين في الوطن العربي ومن أهم الأصوات ده لو حضرتك مش معانا في مجال المزيكا، وبعدين والله يا ريت رامي عندة الوقت بتاع حضرتك الفاضي أوي بتاع 5 شهور فاضي ياريت كنا نتمنى.
وأكملت : موضوع رامي رقم كام ده هو الحقيقة مش شاغل بال رامي أوي، بس لو حضرتك شايف إن رامي رقم 19 مع الأسف الشديد لازم أقول لحضرتك، تبقى انت مش موجود على الخريطة من الأساس، أغنية واحدة من رامي صبري بس تعمل تاريخ لناس.
وواصلت : محتاج تذاكر كويس وتعرف انت بتتكلم عن مين قبل ما تتكلم، لأنك واضح أنك عندك شغل تاني غير المزيكا لأنك لو جوا الشغلانة كنت مش هتقول ولا كلمة من الكلام ده علشان الناس متضحكش عليك لأنك اتكلمت عن فنان بجد مش جاى يهزر.
واختتمت شيري : وأخيراً لما تحب تعمل دعاية لأغنيتك الجديدة ابعد عن اسم رامي صبري، أنا عارفة أن اسمه ممكن يخلى الأغنية تريند، بس حاول الأغنية بتاعتك الجديدة تعتمد فيها على نفسك.
حديث ويجز عن رامي صبري
وكان ويجز قد انتقد رامي صبري من خلال فيديو شاركه عبر ستوري إنستجرام، وقال به : هاتكلم على فنان فاكر أنه عنده صلاحية يطلع يتكلم في أي وقت على أي حد والناس تسمع وتسكت، الفنان ده اسمه رامي، رامي ده بقى كل لما يقعد 5 شهور يزهق يطلع يتكلم في التليفزيون على بتوع الراب والهيب هوب، طيب انت بتتكلم أمتى عن بتوع البوب اللي أنت منهم، على فنك ومجالك وكده.
وواصل : أنا شايف أنك مبتفهمش في الراب ده حاجة، ولا بتفهم الكلام بتاعه زي ما انت قلت قبل كده، فا مش هتعرف تعمله أنا راجل مثلًا لو لقيت واحد بيعرف يسوق عجلة وأنا مبعرفش بحترمه ليه علشان هو عمل حاجة غير اللي أنا عملتها اشتغل على نفسه في حاجة أنا مشتغلتش على نفسي فيها.
وعن ترتيب رامي صبري وسط النجوم، علق ويجز : أنت مبتقدرش الفنانين دول شايفهم بيحاولوا يوصلوا لليفل انت فيه، في حين أنهم معدينك انت مش رقم 2 يا رامي انت رقم 19 مثلًا، انت بعيد أوي.
