ويجز يهاجم رامي صبري : إنت رقم 19 بين النجوم
خرج ويجز للرد على رامي صبري بعد حديث الأخير في تصريحات تلفزيونية مؤخرًا عن نجوم الراب خاصة ويجز وتأكيده أنه لا يفهم كلمات أغانيهم، وشارك ويجز متابعيه عبر ستوري إنستجرام فيديو تحدث من خلاله عن رامي.
ويجز يتحدث عن رامي صبري
وقال ويجز خلال الفيديو : هاتكلم على فنان فاكر أنه عنده صلاحية يطلع يتكلم في أي وقت على أي حد والناس تسمع وتسكت، الفنان ده اسمه رامي، رامي ده بقى كل لما يقعد 5 شهور يزهق يطلع يتكلم في التليفزيون على بتوع الراب والهيب هوب، طيب انت بتتكلم أمتى عن بتوع البوب اللي أنت منهم، على فنك ومجالك وكده.
وواصل : أنا شايف أنك مبتفهمش في الراب ده حاجة، ولا بتفهم الكلام بتاعه زي ما انت قلت قبل كده، فا مش هتعرف تعمله أنا راجل مثلًا لو لقيت واحد بيعرف يسوق عجلة وأنا مبعرفش بحترمه ليه علشان هو عمل حاجة غير اللي أنا عملتها اشتغل على نفسه في حاجة أنا مشتغلتش على نفسي فيها.
وأكمل : أنت مبتقدرش الفنانين دول شايفهم بيحاولوا يوصلوا لليفل انت فيه، في حين أنهم معدينك انت مش رقم 2 يا رامي انت رقم 19 مثلًا، انت بعيد أوي.
أغنية ويجز الجديدة
واختتم ويجز حديثه بالكشف عن عمله الجديد، وقال : جماعة استنوا أغنيتي الجديدة إن شاء الله يوم 27، أغنية مش هقولكم هي عبارة عن إيه، أستاذ رامي بقى ممكن يقولنا ويشرحلنا الأغنية عبارة عن إيه لو فهم.
ماذا قال رامي صبري عن ويجز ؟
يُذكر أن رامي صبري قال خلال تصريحات تلفزيونية : ويجز زعلان مني ومش عارف ليه، أنا قلت إني مش بفهم كلامه ودي حقيقة بس قلت عليه إنه بيعمل مزيكا حلوة ومجتهد.
كما تحدث رامي خلال نفس اللقاء التلفزيوني عن نجوم الغناء وترتيبه بينهم، وقال : أنا من ضمن قائمة Top 5 بين نجوم الغناء في مصر، ومنهم عمرو دياب وتامر حسني ومحمد حماقي، ونحن دائمًا متواجدون في قائمة الأعلى على المنصات الموسيقية.
آخر أغاني ويجز
ومن ناحية أخرى، كانت أغنية أصلي عربي آخر أغاني ويجز، والتي طرحها بالشهر الماضي وجاءت ضمن حملة دعائية لشركة عقارات، وحصدت حتى الآن أكثر من 3 ملايين مشاهدة على يوتيوب.
