يحيى الفخراني : ارتجلت مشهد العزاء في فيلم الكيف وضربت محمود عبدالعزيز بجد في إعدام ميت

تحدث يحيى الفخراني مع صاحبة السعادة، الذي تقدمه إسعاد يونس، عن أهم أعماله وهو فيلم الكيف، وكواليس ترشيحه للعمل الذي حقق من خلاله نجاح كبير.

وقال : في الكيف رشحوني أنا ومحمود عبدالعزيز وكلمت محمود وقولت له تحب تعمل إيه، واقترحت عليه إنه يقدم شخصية مزاجنجي وأنا أعمل شخصية دكتور صلاح أبو العزم، وأنا كنت أقدر أعمل الدورين لكن الصح إنه يعمل شخصيته دي، وعن مشهد العزاء في فيلم الكيف قال : قلت للأستاذ علي عبدالخالق، عايزين نعمل المشهد مرة واحدة ومكانش مكتوب، وقتها سألني محمود أبو زيد بعد التصوير أنت بتشرب حشيش، من صدق الأداء.

وتابع : لفيت كتير علشان أشوف مدمنين، وتابعت ناس كتير علشان أعرف بيكونوا عاملين إزاي، ولما جيت أعمل الشوت، كان سعيد الشيمي كاميرا مان، وعملته كما لو كنت مدمن بجد، ونزلت إفرازات من عينيا، وقتها طلبوا مني إعادة المشهد ومعرفتش أقدمه زي ما عملته أول مرة، وقمت بإعادته تاني يوم.

وعن فيلم إعدام ميت قال : صورنا الفيلم في الأماكن الحقيقية في سيناء بعد خروج إسرائيل من سيناء، وكان هناك مقرات للمخابرات الإسرائيلية، وكان في الوقت ده بيقدموا اليهودي بشكل تقليدي، وأنا كنت عايز أقدم شخصية أبو جودة بشكل قوي علشان ناخد بالنا من عدونا ونعمله حساب.

وعن مشهد ضرب محمود عبدالعزيز بالقلم قال : قمنا بتصويره من زاوية من غير ما أضربه، لكن في الزاوية التانية كان لازم أضربه وطلبت منه يتحمل، ولما ضربته بكى وحضنته واعتذرت له.