أحمد حاتم : حياتي اتغيرت بسبب ابني وفيلم أوقات فراغ كان نقطة تحول
حلّ أحمد حاتم ضيفًا على برنامج ABtalks مع أنس بوخش، المذاع عبر قناته على يوتيوب، وتحدث عن عدد من تفاصيل حياته، وعلاقته بإبنه عزيز، وذكرياته مع فيلم أوقات فراغ.
علاقة أحمد حاتم بابنه
وقال أحمد حاتم : الأبوة غيرت فيا حاجات كتير، وبقيت بستوعب الناس أكتر وبعرف اسمعهم واتكلم معاهم، وعزيز ابني هو السبب في كل حاجة بعملها، لأنه خلاني شخص مش أناني وبقيت عايز أبقى في حياته، وتابع : بعد الطلاق بقيت بمارس دوري كأب معاه مظبوط ومامته مساعداني في ده، ولولا وجوده كان ممكن متحركش علشان حاجة، وحاسس إني بقيت أحسن بسببه، ومش حاسس إن حظي وحش في الحياة بسبب وجوده.
وأضاف : لو هاوجه رسالة لـ عزيز ابني هقوله مايبقاش مؤذي، ويبقى ناشف ومتزن ومايبقاش شخص سهل، ويبقى عنده خبرات وأتمنى أشوفه ناجح ومحقق اللي بيحبه ومعندوش فشل في حياته وأتمنى أكون مصدر فخر له ومبسوط إني والده.
لحظة تحول في حياة أحمد حاتم
وقال أحمد حاتم عن بدايته : بعد أوقات فراغ كانت مرحلة غريبة، كان عندي صحابي كتير قوي بقت علاقتي بهم مش معروفة وناس بدأت تبعد لما بقيت مشهور.
وتابع : كنت عايز أمثل بس كنت محرج أقول علشان أنا شخص خجول وماكنتش عايز أعمل إعلانات لنفس السبب، وأنا داخل الجامعة قررت أدرس تمثيل جنب الإعلام، ولما عملوا فيلم أوقات فراغ كنت عملت كاستينج مع ناس كتير واتفاجئت أنهم اختاروني.
أوقات فراغ
واختتم : الفيلم نزل في وقت غريب، خاصة إن كان صعب تلاقي فيلم كله وجوه جديدة وكان بطولة، ونزل في وقت كنت بوزع أنا وكريم قاسم فلاير في الشارع ومحدش عارفنا ولما الفيلم نزل روحنا نشوفه في السينما عادي لقينا الناس عارفانا ودي كانت لحظة تحول في حياتي.
فيلم الملحد
وينتظر أحمد حاتم خلال هذه الفترة فيلم الملحد، ويشارك في بطولة الملحد، أحمد حاتم، محمود حميدة، صابرين، حسين فهمي، تارا عماد، شيرين رضا، نجلاء بدر، مصطفى درويش، وأحمد السلكاوي، ومن تأليف الكاتب إبراهيم عيسى، وإخراج ماندو العدل.
وسبق وتحدث مخرج العمل ماندو العدل، وقال : اسم العمل أثار الجدل قبل عرضه من الأساس، لأنه يتحدث عن موضوع شائك وهو الإلحاد، كما أنه من تأليف إبراهيم عيسي الذي دائمًا ما تثير أعماله الجدل، وأتوقع أنه سيكون أجرأ فيلم عربي فى آخر 100 سنة، والعمل لا يروج للإلحاد ولكن يناقش هذه الظاهرة المنتشرة بشكل كبير وأسبابها ونحاول توجيه الشباب في الفيلم.
