كزبرة يتعاقد على أول بطولة درامية مطلقة بعنوان على ضهر راجل
أعلن أحمد بحر، الشهير بـ كزبرة عن تعاقده على أول بطولة درامية مطلقة له بعنوان على ضهر راجل، وذلك بعد نجاحه في دور فؤش في مسلسل الغاوي.
وكتب كزبرة عبر استوري إنستجرام : بسم الله الرحمن الرحيم، الحمد لله حمدا كثيرا، أنا حابب أتكلم في موضوع، شكرا لكل حد بعتلي رسالة حلوة واتكلم عني واداني حقي في دور فؤش في الغاوي.
وأضاف : الفترة اللي فاتت كان في ناس كتير حواليا بتقولي أنت مجنون عشان رفضت حاجات في رمضان، ومنها بطولات، بس أنا مكنتش مرتاح، ومكنش فارق معايا غير إني أعمل حاجة حلوة، وروحت عملت دور فؤش رغم إنه صغير، بس اللي شجعني إنه مختلف، وكنت متأكد إن ربنا هيكرمني لأني عايز أقدم حاجة الناس تحبها.
وأكمل : الحمد لله ربنا كرمني، والناس طلعت بتقدر الحاجة الحلوة، وأكدتلي إن المهم مش الكم، لكن إنك تعمل حاجة أنت مصدقها وراضي عنها، وسيب الباقي على ربنا، وساعتها هتطلع كسبان.
وفاجئ كزبرة جمهوره بالإعلان عن أول بطولة مطلقة له في الدراما، وقال : اللي جاي هيعجبكم أكتر وأكتر، مسلسل على ضهر راجل هيكون حاجة مختلفة وهتتبسطوا بيه أووي، يارب أبقى قدها.
أبطال الغاوي
ويشارك كزبرة في مسلسل الغاوي، من بطولة أحمد مكي، عائشة بن أحمد، عمرو عبدالجليل، أحمد بدير، أحمد كمال، محمد لطفي، ولاء الشريف، كرم جابر، هاجر عفيفى، أبيوسف، وتامر شلتوت، تأليف محمود زهران وطارق الكاشف، إخراج ماندو العدل، وإنتاج شركة سينرجي.
قصة العمل
تدور قصة الغاوي حول بلطجي خطير يفقد زوجته بصورة مأساوية ويتعرض لظلم شديد، مما يدفعه إلى إعادة التفكير في حياته، فيقرر التخلي عن عالم الجريمة من أجل تربية ابنه بطريقة سليمة لكنه يواجه تحديات كبيرة خلال رحلته نحو التغيير، ومع مرور الوقت، يتحول إلى رمز شعبي يحظى باحترام وحب أهل منطقته.
فيلم أوفر سايز
ويخوض كزبرة أيضا تجربة البطولة المطلقة لأول مرة في السينما من خلال فيلم جديد يحمل اسم أوفر سايز، حيث أعلن عنه مؤخراً عبر حسابه على إنستجرام، وعلق قائلاً : توكلنا على الله، استنونا في الصيف الجاي، بفيلم أوڤر سايز، فى شخصية عماد البطئ، من إنتاج طارق الجناينى.
