الشيف حسن : طبق مهلبية فتح لأم كلثوم باب الشهرة والنجومية
كشف الشيف حسن أسرارا في حياة كوكب الشرق أم كلثوم التي تحل اليوم ذكرى وفاتها الـ 50 وعلاقتها بالأكل، وذلك خلال برنامج أهلا بالستات الذي يقدمه على شاشة mbc مصر مع بثينة توكل.
الشيف حسن يحيي ذكرى وفاة أم كلثوم
وقال الشيف حسن : مصر كلها والعالم العربي يحتفلون اليوم بحدث فني مهم، وهو مرور 50 سنة على رحيل كوكب الشرق أم كلثوم.
حب أم كلثوم للمهلبية
وواصل : الست مكانتش بتحلم بموضوع الغنا ولا التمثيل ولا الفن ولا الأضواء، واللي زقها على السكة دي كان طبق مهلبية، وكانت بتقول إن أبوها وهي صغيرة سمعها فى يوم وهي بتغني في البيت، ولما حس إن صوتها حلو وطلب منها إنها تنضم لفرقته رفضت، فقالها هجيبلك طبق مهلبية كبير وتيجي معانا.
وأكمل : أم كلثوم سمعت مهلبية من هنا، ووافقت من غير أي ذرة تردد، وكانت تقول دائمًا في حواراتها إنها مابتقدرش تقاوم المهلبية لحد ما وصلت إلى مرحلة وبقت تعملها مشاكل بسبب الحساسية فامتنعت الست عنها، وكانت لحظة من أصعب لحظات حياتها.
أكلات أخرى كانت تحبها أم كلثوم
وتابع الشيف حسن حديثه كاشفًا عن أكلات أخرى كانت تحبها الراحلة، وقال : وهي صغيرة يمكن ناس كتير ما تعرفش إن ظروفها المادية كانت صعبة، وعلشان كده أول ما أبوها الشيخ إبراهيم البلتاجي بدأ يحس أن أحواله المادية اتصلحت، قرر إنه يهتم بأكل أم كلثوم، وفي الوقت ده سمع من الناس إن البيض بيحسن الصوت وبيخليه قوي وبيجلجل، فبقى كل يوم يجيب لها لوحدها خمس بيضات تاكلهم، لكن بعد كده اتضح أن البيض أثر على المرارة، فالدكاترة منعوها منه.
واختتم حسن : الكاتب الكبير أنيس منصور هو كمان كشف عن أكلة مهمة جدا بالنسبة لأم كلثوم، وكتب فى مقاله كبارنا.. ماذا يأكلون؟، وقال إن أم كلثوم كانت بتخصص يوم تعزم فيه صديقاتها المقربات على أكلة مورتة، وكانت فى اليوم ده بتصمم إنها تاكل على الأرض مش على السفرة.
