رامى صبرى ينهى خلافه مع ويجز : أخويا الصغير ومسامحه
أعلن رامى صبرى منذ قليل عن إنهاء الخلاف بينه وبين مغنى الراب ويجز، وذلك فى رده على منشور الشاعر تامر حسين الذى دعم فيه صبرى مشيداً بموهبته ومكانته وسط نجوم الغناء، ليؤكد رامى على انتهاء الأزمة وأنه سامح ويجز.
تامر حسين يدعم رامى صبرى
وقال تامر حسين عبر حسابه على فيسبوك داعما رامي: شهادتي فيك مجروحة أنت صوت عبقري مش محتاج رأيي وخطواتك ما شاء الله لطريق النجاح بتكبر وتزيد، وكل سنة عندك هيت ناجح ومكسر الدنيا، ولسة شايف ترتيب أنغامي أنت رقم 2 في الاستماع بعد الهضبة.
وعن خلافه مع ويجز، تابع: تصريح مش موفق مِن ويجز رغم إني شفت له أكتر من لقاء كان راجل مُثقف ومُهذب جايز يكون واخد على خاطره، أو فِهم كلامك غلط، إنما الأرقام اللى قالها مش أرقامك ولا الطريقة مُناسبة وأنت الكبير يا روما.. ويجز لو يعرف إنت أول واحد باعتلى أغنية البخت وبتقولى الراجل ده عنده حاجه مختلفة مكنش هيزعل كده، دي شهادة حق والله.
رامى صبرى ينهى خلافه مع ويجز
ورد رامى صبرى على منشور تامر حسين، على فيسبوك، وكتب قائلاً: حبيبي تامر حسين الشاعر الكبير العظيم، شكرا علي كلامك الجميل اللي زيك.. ويجز أخويا الصغير وأنا مسامحه وحصل خير.
ماذا قال رامي صبري عن ويجز ؟
يُذكر أن رامي صبري قال خلال تصريحات تلفزيونية سابقة : ويجز زعلان مني ومش عارف ليه، أنا قلت إني مش بفهم كلامه ودي حقيقة، بس قلت عليه إنه بيعمل مزيكا حلوة ومجتهد.
كما تحدث رامي خلال نفس اللقاء التلفزيوني عن نجوم الغناء وترتيبه بينهم، وقال : أنا من ضمن قائمة Top 5 بين نجوم الغناء في مصر، ومنهم عمرو دياب وتامر حسني ومحمد حماقي، ونحن دائمًا متواجدون في قائمة الأعلى على المنصات الموسيقية.
حديث ويجز عن رامي صبري
ورد ويجز على تصريحات رامى، من خلال فيديو شاركه عبر ستوري إنستجرام، وقال : هاتكلم على فنان فاكر أنه عنده صلاحية يطلع يتكلم في أي وقت على أي حد والناس تسمع وتسكت، الفنان ده اسمه رامي، رامي ده بقى كل لما يقعد 5 شهور يزهق يطلع يتكلم في التليفزيون على بتوع الراب والهيب هوب، طيب انت بتتكلم أمتى عن بتوع البوب اللي أنت منهم، على فنك ومجالك وكده، أنت مش رقم 2 أنت رقم 19.
