ميار الببلاوي : دعيت على المخرجة إيناس الدغيدي ومش هسيب التمثيل عشان بحبه
كشفت ميار الببلاوي عن تفاصيل حياتها الشخصية والفنية وعلاقتها بالنجوم، وذلك من خلال برنامج العرافة، تقديم الإعلامية بسمة وهبة، المذاع على قناة النهار.
مكنتش عايزة أعمل كل المشاهد دي
وقالت ميار الببلاوي : في فيلم ديسكو ديسكو مكنتش عايزة أعمل كل المشاهد دي، ولكن إيناس الدغيدي خلتني أعمل مشاهد ساخنة في نهار رمضان، زي مشهد المايوه، ومشهد شريف منير، ومشهد عمرو عبدالجليل، وأنا خلاص الحمد لله اتحجبت، وهي مشاهد لا تليق للعرض في رمضان، ومش عايزة حد يجيب سيرتها تاني.
دعيت على إيناس الدغيدي فى الحرم
وتابعت : كان عندي 19 سنة ومبهورة بعالم التمثيل، وكنت مش مصدقة إني بمثل مع نجلاء فتحي، وفي نفس الوقت كنت مطيعة أوي، لكن في مشاهد رفضت أعملها في نهار رمضان وإيناس الدغيدي أصرت عليها، ودعيت عليها بعدها في الحرم.
وذكرت : الفنانة نجلاء فتحي أقنعتني إني أعمل مشهد ساخن في نهار رمضان، بحجة إن رمضان ده شهر الفقراء ومنع أكلنا وشربنا عشان نحس بيهم فقط، وأقنعتني وعملت المشهد، وده بعتبره من ضمن التنازلات اللي قدمتها عشان التمثيل.
مغلطتش لما لبست باروكة
وأضافت : بعد الحجاب مسبتش التمثيل عشان بحبه، ومشهد السرير تم الإشراف عليه واتعرض في السعودية، وليس خارج، ومش غلطانة لما لبست باروكة فيه لأن كنت بمثل مشهد وأنا نايمة، وعملت بعدها عمرة.
من ناحية أخرى شهد عام 2016 انتعاشة فنية لـ ميار الببلاوي حيث شاركت في عدة أعمال خلاله، منها قضاة عظماء، جراب حواء، آه من حواء، ستات قادرة، وهو الأكثر شهرة بينهم، وجسدت خلاله دور تقى.
ودارت أحداث العمل حول ثلاث سيدات كن يعملن خادمتين ودلالة في تسعينات القرن الماضي، ولا توجد أي علاقة تربطهن ببعض ولكن ظروف الحياة تجمعهن في رحلة صعودهن من الصفر وتجعلهن صديقات ليكشف المسلسل عن أحلامهن ومشاكلهن المشروعة وغير المشروعة.
والمسلسل من بطولة نجلاء بدر، عبير صبري، ريهام سعيد، عمرو عمروسي، هياتم، ميار الببلاوي، ناهد رشدي، هبة السيسي، ياسر الطوبجي، والمسلسل من تأليف وإخراج أحمد عاطف، وسيناريو وحوار محمد إسماعيل أمين.
