فيفى عبده : بيجيلي عرسان لحد دلوقتى والست اللى جوزها يخونها تطنش
كشفت فيفي عبده بدايات دخولها مجال الرقص الشرقي، والصعوبات التي مرت بها، بالإضافة لموقفها من دخول حفيدتها مجال الرقص.
وقالت فيفي عبده خلال لقائها ببرنامج حبر سري، المذاع على شاشة القاهرة والناس، وتقدمه أسما إبراهيم : ولادي أفضل هدية جاتلي في حياتي وهما كل الدنيا بالنسبة لي.
تعرضت للتحرش في امرأة واحدة لا تكفي
وتابعت : تعرضت للتحرش خلال تصوير أحد المشاهد في فيلم امرأة واحدة لا تكفي، ولكني ضربت هذا الشخص، وأبلغت فريق الإخراج بالواقعة.
واستكملت : مقدرش أكون زوجة ثانية، والرجالة هي اللي بتدور عليا دايما وعمري ما جريت ورا راجل، وأنا معترفة بالزواج العرفي وبعتبره فترة خطوبة واستحالة راجل يلمسني من غير زواج، وكل الرجالة اللي اتجوزتهم محترمين وحظي كان حلو في جوازاتي.
ووجهت فيفي عبده نصيحة للسيدات اللاتي تعرضن للخيانة من أزواجهن، قائلة : لو الست عرفت إن جوزها بيخونها تطنش وتعمل نفسها مش عارفة، ومفيش راجل معندوش نزوات، وفي إحدى المرات الشحرورة صباح كانت معايا في العربية وقالتلي إنها مختلفة مع جوزها ودخلت في حالة نفسية صعبة، ومن وقتها بقيت مقتنعة إن الست لازم تطنش.
أرفض دخول حفيدتي مجال الرقص الشرقي
أما عن موقفها من دخول حفيدتها مجال الرقص الشرقي، قالت : لو حفيدتي طلبت تدخل مجال الرقص هرفض، لإن على أيامي الوضع كان مختلف والناس كانت محترمة، ولكن أي حد بيتكلم في الرقص دلوقتي بيفتي، وأنا اتبهدلت في الشغل كتير وموصلتش لمكاني ده بالساهل، وحاليا مفيش راقصات مصريات، والكُتاب في الفترة الحالية بيصدروا لينا دايما إن الراقصة شخص مش كويس.
وتطرقت لزواج بعض الفنانين الكبار في الفترة الأخيرة، قائلة : مين قال إن الست الكبيرة مينفعش تتجوز، وكل يوم بيجيلي عرسان، وأنا حاليا ست متزوجة، ولو كنت سينجل واتقدملي عريس كنت هتجوز.
وتحدثت فيفي عن أصعب الفترات التي مرت عليها في حياتها، قائلة : وفاة اثنين اخواتي في سنة واحدة خنجر دخل في قلبي ومكنتش عايزة أشوف حد ولا أتكلم مع حد وكنت باخد مهدئات ونفسيتي كانت وحشة.
ومن ناحية أخرى، تغيب فيفي عبده عن الموسم الرمضاني الجاري 2024، وكان آخر أعمالها في رمضان، مسلسل شغل في العالي، الذي قدمته عام 2022، وتناول قصة صديقتين وهما فيفي عبده وشيرين رضا اللتان تجمعهما صداقة قوية، وتقومان بتأسيس شركة للانتقام من الرجال سواء المتحرش أو الذي يقوم بمعاملة زوجته بطريقة غير لائقة.
ومسلسل شغل في العالي بطولة فيفي عبده، شيرين رضا، مروان يونس، محمد رضوان، توني ماهر، بسمة داود، كريم سرور، ورشا بن معاوية، تأليف حسين مصطفى محرم، وإخراج مرقس عادل.
