أحمد الفيشاوي : عايز أبقى مخرج وأعمل أفلام حلوة وناهد فريد شوقي ماتت زعلانة مني
حلّ أحمد الفيشاوي ضيفًا على برنامج ع المسرح، تقديم الإعلامية منى عبدالوهاب، المذاع على قناة الحياة، وكشف عن عدد من تفاصيل حياته، وعلاقته بالنجوم، وتطلعاته المستقبلية.
وقال أحمد الفيشاوي : لما ابتديت أمثل سنة 2000 أخدت رأي أبويا في لعب الشخصية فعلمني وقال لي أي حاجة تقولها لازم تلتزم بالصدق، لأنك بتلعب دور مش بتاعك وممكن يكون ضد مبادئك وعقيدتك بس لازم علشان الناس تتفاعل معاك وتحب أفلامك تصدق إنك الشخصية اللي بتلعبها.
وأضاف : أنا لما بحب حاجة بهرب منها لو حسيت إنها هتتملكني خاصة لو كانت مؤذية، وأنا مش بتاع نفسي أنا بتاع الناس، ووالدي فاروق الفيشاوي كان بيقولي أنت مش بتاع نفسك أنت ملك الناس ولازم تقدر وتراعي ده، ومش عايز السينما تتملكني لإني عايز أبقى مخرج وأعمل أفلام حلوة، ولو عندي 80 سنة أقدر أكون مخرج لإني مع العمر ده لو بقيت ممثل محدش ممكن يتصل بيا.
أزمتة مع ناهد فريد شوقي
وعن أزمته مع المنتجة ناهد فريد شوقي قال : ماتت زعلانة مني، وأنا كمان زعلان منها، بس هنعمل إيه؟ ربنا يرحمها ويسامحها، ومندمتش إنها زعلت مني لإن هي اللي مزعلاني، واذكروا محاسن موتاكم والحي أبقى من الميت.
من ناحية أخرى نافس أحمد الفيشاوي خلال موسم الصيف بفيلمي السيستم وعادل مش عادل، وحقق من خلالهما إيرادات مقبولة.
فيلم عادل مش عادل، يشارك في بطولته بجانب الفيشاوي، كل من شيري عادل، محمد رضوان، محمود البزواي، دينا، بدرية طلبة، ومصطفى أبوسريع، ومن تأليف هيثم سعيد وحسام كمال وإخراج أحمد يسري، ويجسد الفيشاوي خلال أحداث فيلم عادل مش عادل، شخصية محامي، يمر بالعديد من المشاكل التي يحاول حلها في إطار كوميدي.
أما فيلم السيستم بطولة أحمد الفيشاوي، طارق لطفي، نسرين طافش، بسنت شوقي، ميس حمدان، وأحمد فهيم، ومن تأليف أحمد مصطفى، إخراج أحمد البنداري، وإنتاج كريم الشربيني وإيهاب منير، وجسد الفيشاوي خلاله شخصية شاب لديه عقدة من التعامل مع السيدات، بينما يظهر طارق لطفي بشخصية زير نساء وصديق الفيشاوي المقرب، ويحاول مساعدته في التخلص من عقدته تجاه السيدات الجميلات.
