عادل إمام يتصدر التريند بسبب عرض ندوته الأرشيفية علي القاهرة الوثائقية أمس
تصدر الزعيم عادل إمام تريند جوجل والسوشيال ميديا خلال الساعات الأخيرة، وذلك عقب عرض قناة القاهرة الوثائقية لـ ندوة أرشيفية بعنوان تحديات القرن، وذلك خلال فعاليات معرض القاهرة الدولي للكتاب عام 2000 في دورته ال 32، وأدلى الزعيم خلالها بعدد من التصريحات.
سفير النوايا الحسنة
حيث تحدث فيها عن تعيينه سفير نوايا حسنة وقال : فخور إني أول عربي اختير لهذة المنظمة، وشفت مرة صورة للفنانة العظيمة اودري هيبورن ماسكة طفل أفريقي مش لاقي ياكل، ولم أكن أتصور أني يوماً ما هكون سفير زيها، وأقدر أخدم بلدي مصر وكل اللاجئين في العالم.
لقب الزعيم
وعن لقب الزعيم قال : مهما اتشتمت وحد تطاول عليا أو يحاول يقلل من قيمتي، أنا بعتمد على حضراتكم وجمهوري بالدرجة الأولى، واسمي عادل إمام، وأعتقد إن اسم عادل إمام يصل للقلوب أحسن من أى لقب وده يسعدني أكتر، وقعدت سنتين مفيش مليم في جيبي، محدش يقولي تعالي اعمل تمثيلية إذاعة، نسيوني، بعد ما عملت أنا وهي، نسيوني، أنا بحب المهنة ومجرتش ورا الشهرة والنجومية لكن جريت ورا الدور الكويس والفكر اللي عاوز أوصله، مع أني باخد أكبر أجر في تاريخ السينما، كل الفلوس اللي باخدها أديها لمراتي هي اللي تصرف.
وتابع : بحب إسماعيل يس طبعًا، ويوسف وهبى وزكي طليمات، ومحمد زكي جمعة كان رئيس فريق التمثيل في كلية الزراعة قبل ما أنضم أنا، وصارت صحوبية بيننا، وآخر سنة كنت رئيس الفرقة، وقلت اسمه في مسرحية مدرسة المشاغبين.
وتحدث عن القضية الفلسـ طينية، وقال : أول ما روحت غـ زة قلت للسواق يوديني لمخيم اللاجئين، المشكلة الفلسطينـ ينة مع المصريين كلهم من أولها وحتى الآن عامله زى ما الواحد يربي ابنه صغير ويعلمه ويجوزه، فيفضل الأب شايل هم الابن، هي القضية الفلسطيـ نية للمصريين عامله كدة بالضبط.
وذكر : مصر شعب واعي تمامًا، ومش هيقبل إن حد يعمل مشاكل بين الأقباط والمسلمين، أنا فخور بالأزهر لأنه مصري وفخور بالكنسية المصرية إنها مصرية وأول كنيسة في العالم كانت قبطية، والمصريين مختلفين في أي حاجة، وسعيد إننا مصريين وسعيد بأقباط مصر والأزهر، وإن أي حد ييجي مصر يتبسط.
وتحدث عن عمله مع نجله رامي إمام وصديقه الفنان الراحل سعيد صالح : المخرج الوحيد اللي اتخانقت معاه هو رامي إمام، وأنا عاملته كإبني وهو عاملني إني أبوه، اختلفنا في حاجات كتير واتضح بعد كده إن هو الصح، وأحلى أدوار سعيد صالح فى السينما عملها معايا.
