سامح حسين : سمير غانم رسول الضحك ونفسي أشتغل مع دنيا سمير غانم

تحدث سامح حسين عن تجربته في مسلسل راجل وست وستات، وعلاقته ببعض النجوم مثل أشرف عبدالباقي وسمير غانم، وذلك خلال لقائه ببرنامج مساء الإمارات، المذاع على قناة الظفرة، الذي يقدمه عبدالعزيز أحمد.

وقال سامح خلال لقائه : رمزي في راجل وست ستات هو اللي عرفني على كل الوطن العربي، رغم أن كان عندي محاولات قبل كدة بس دة اللي انتشر، والكوميديا اللي شوفناها كان سببها التيم كله من ورشة الكتابة والمخرج والثنائي اللي قدمناه أنا وأستاذ أشرف.

وأضاف : اشتغلنا 7 مواسم وكل موسم 34 حلقة، وفي الأول كنت بقول لأشرف عبدالباقي، يا عادل، لكن وأنا بشتغل على الورق، اقترحت إني أقوله دوله حبيبي، كل ما يزعقلي لإنها هتبقى ألطف، ومفكرتش أقدم شخصية رمزي لوحده ولكن لو اتعمل المسلسل تاني هشارك فيه.

أما عن تجربته في السينما والفيلم المقرب لقلبه، قال : أنا راضي عن أفلامي في السينما جدًا وإلا مكنتش هقدمها وأكتر فيلم بحبه هو عيش حياتك، لأنه من تأليف مراتي وهي دارسة دراما وبتقرأ كتير، والفيلم عن تجارب حقيقية عشناها سوا وبيقدم صورة مشرفة للبلد، لأن أي حد عنده انتماء لبلده، بيشتغل بسلاحه وأنا سلاحي الفن.

وتحدث عن علاقته بأشرف عبدالباقي، قائلا: بعتبره أخويا الكبير وتجربتي معاه في راجل وست ستات، ضافت لي الكثير، وهو كان متسامح للغاية، ففي بعض الحلقات كانت شخصية سامح بتضحك أكتر من أي شخصية تانية، ووجدت منه دعم كبير.

وتابع: سمير غانم بعتبره رسول الضحك وكان شرف كبير لي إني اشتغلت معاه في مسلسل الزناتي مجاهد، ووقتها كان ضيف شرف فيه، وموافقته أنه يشترك في المسلسل دة شرف لينا، وأتمنى أشتغل مع دنيا سمير غانم لإنها بتجيد كل الأدوار وموهبة خطيرة.

واستكمل: عادل إمام مدرسة ونفسي أشتغل معاه وهو قيمة كبيرة وبيثقل المهنة بتاعتنا، واعتذرت عن مسلسل فلانتينو لأنه مكنش فرصة، لأن الفرصة هي إني اشتغل مع قيمة كبيرة حتى لو دور صغير وإني استفيد بوجودي معاه، وحاليا بحضر لمسلسل وفيلم من تأليف زوجتي ينتميان لنوعية الأعمال الكوميدية.