صفية العمري : نازك السلحدار لم تضف لي ومعظم المنتجين مبقوش يعرفوني وبعاني من الوحدة

كشفت صفية العمري خلال لقائها ببرنامج ليالي Ten، المذاع عبر قناة Ten، عن كواليس مسلسل ليالي الحلمية، والذي مازال يحظى بمتابعة كبيرة بين الجمهور رغم تقديمه منذ ما يقرب من 35 عامًا.

وقالت صفية العمري : نازك السلحدار دي شخصيتي أنا، وطول عمري كده من وأنا صغيرة ودي شخصيتي، ونازك لم تضف لي شيئًا، بالعكس أنا اللي ضفت ليها من روحي ومن شخصيتي.

وعن قلة أعمالها الفنية في الفترة الحالية، تابعت : أنا معرفش معظم المنتجين دلوقتي ويمكن هما مبقوش يعرفوني خلاص، ومازال عندي عطاء ولسه بقدر أشتغل، وفي شخصيات وأدوار معينة بحلم إني أعملها، والمرأة المصرية ليها وجود هايل، ليه ميكتبوش عن نجاح المرأة المصرية؟.

وتابعت : مبقاش عندي أمل، لأن مش دول المنتجين بتوع زمان اللي بيعرفوا يختاروا الفنان المناسب للشخصية، أنا مش عايزة أظلم حد، ولكن احنا مبقيناش مهمين بالنسبة لهم وملناش وجود، وأنا بعاني من الوحدة، وولادي ربنا يخليهم ليا بحاول قدر الإمكان إني أسافر عندهم في أمريكا، لكن فيه وحدة طبعًا والشغل كان بيلهيني.

وتحدثت عن شخصيتها، مشيرة إلى أنها شخصية خجولة ولا تسطيع الذهاب بمفردها لأي مكان، مضيفة : أنا معرفش أمشي لوحدي لازم حد ييجي ياخدني من البيت، طول عمري حتى لما كنت بسوق العربية كنت بتوه.

ويعد فيلم كان لك معايا، آخر أعمال صفية العمري، وهو من تأليف وإخراج روجينا بسالي، وعرض عام 2020 وهو عبارة عن فيلم قصير، وشارك في بطولته محمود قابيل، عائشة بن أحمد، منة جلال، أسامة أسعد.