محمد هنيدي : اترشحت للمشاركة في فوازير عمو فؤاد واكتشفت إني هظهر في التتر

واصل كل من محمد ثروت ومحمد محمود ومحمود حافظ حديثهم في برنامج هنيدي شو، الذي يقدمه محمد هنيدي على قناة المحور، وكشفوا عن كواليس جديدة في مسلسل أرض النفاق.

وقال هنيدي : كنت سعيد لما عرضوا عليّ تقديم فيلم أرض النفاق اللي قدمه الفنان الكبير فؤاد المهندس، وكان ليا موقف معاه، وقتها كنت بشتغل في مسرح الجامعة، وكان المخرج عادل زكي يعمل في مسرح السلام، وهو من كان يخرج لنا مسرحيات الجامعة، وكان هو مدير إنتاج مسرحيات الفنان فؤاد المهندس، وفي يوم من الأيام كلمني وروحتله المنيل وقالي خلاص هتتشهر، وهتشتغل في 15 حلقة من فوازير عمو فؤاد، وكنا وقتها في شهر شعبان، ورجعت من المنيل وذهبت إلى إمبابة والشارع كله عرف، وعدى كتير ومفيش أي جديد، لحد ما جه يوم وقالي بكرة تيجي التلفزيون ستديو 10 الساعة 11.

وتابع : أخبرت كل أهل إمبابة إني رايح التلفزيون، وهناك الأمن منعني من الدخول، وقولتله رايح سنديو 10 للأستاذ عادل زكي، ودخلت بعدها طلب الأستاذ عادل من أحد مساعديه يلبسني فرعوني، وقابلت مدام زوزو نبيل، ولما فتحوا الاستديو ظهر الفنان فؤاد المهندس، وسألت عن دوري وحد قالي لما يعدي خليل مرسي، هتسجد على الأرض وتقول عاش فرعون العظيم.

وأضاف : لما روحت البيت كلمت الأستاذ عادل زكي وقولتله مش عايز المشهد ده يتعرض قالي لا ده في التتر بس، وليك 10 جنيه تعالى خدها.