أحمد السقا يتذكر همام فى أمستردام : نسينا البزاوي في المصرف بعد تصوير مشهد البط وسعيد حامد كان هيتقبض عليه فى المطار

واصل أحمد السقا اليوم السبت، حديثه مع برنامج هنيدي شو، الذي يقدمه محمد هنيدي، وتحدث في الجزء الثاني من اللقاء عن فيلم همام في أمستردام، وذكرياته في العمل وكواليس التصوير.

وقال السقا : لما روحنا الجنينة علشان محمود البزاوي يصور مشهد البط، لبسوه بدلة الأول تحت هدومه علشان دي بركة وجابوا البط اللي صايدينه، ونزل البزاوي يصور المشهد الساعة واحدة بالليل وهو مبيعرفش يعوم، والليلة عدت على خير وروحنا، وقعدت أدور على البزاوي في الفندق، ورجعنا دورنا عليه لقيناه في المصرف، أتاري إحنا نسيناه ومشينا وزعل وقتها من الموقف ده.

وتابع : البزاوي كان صاحبي جدًا وإحنا مسافرين كان أول مرة يسافر ويركب طيارة، ولما شافني في مطار أمستردام فرح لأنه ميعرفش حد، والمطار كان كبير جدًا، ورحنا حطينا الشنط في الأوتيل، وأخدته ونزلنا روحنا الملاهي في عيد ميلاد الملكة، وركبته لعبة صعبة وقعدت تحت أتفرج عليه وهو خايف جدًا، وقعد يومين في الفندق، وكان بيقولي الشقة دي مسكونة، لأن الزرع كان بيتحرك من مكانه.

واستكمل : موقف آخر تكرر مع المخرج سعيد حامد حين قال لأمن المطار إن حضوره إلى هولندا سببه shooting وكان يقصد تصوير فيلم، إلا إن أمن المطار ظنوا إنه حضر إلى هولندا لتنفيذ عملية قنص أو اغتيال.