بوسي شلبي : أنا مش قليلة الأدب علشان أتنمر على حد ودميانة حبيبتى وصاحبتي
فوجئت بوسى شلبي بهجوم كبير من قبل رواد السوشيال ميديا بعد تناقل حديثها مع دميانة نصار بطلة فيلم ريش، الذى أثار الجدل عقب عرضه ضمن فاعليات الدورة الخامسة بمهرجان الجونة.
وأشار البعض ممن هاجموا بوسي شلبي إلى أنها صرحت خلال اللقاء الذى أجرته مع دميانة وقالت : أنا بقول إن عمر غير مصير ناس في الفيلم ده لأنه فتح باب رزق جديد لعيلة من المنيا ماكانتش تقدر توصل خالص للمكان اللي إحنا فيه ده.
وللتوضيح والوقوف على حقيقة ما جرى تواصل خبر أبيض مع بوسي شلبي، والتى قالت إنها لم تتعمد التنمر على دميانة وأسرتها كما ردد البعض.
وتابعت : أنا عمرى ما كنت قليلة الأدب مع أى حد، ودميانة فى الأساس صديقتي ومش زعلانة من كل اللى بيتقال وده المهم عندي، وأنا أول من استضافها وفريق العمل بعد عودتهم من مهرجان كان.
وأضافت بوسي : أنا قلت نصا أن عمر الزهيرى حقق حلمهم بأنهم يوصلوا لمهرجان مهم مثل كان، لكن البعض حرف ما قلته، وأكد أنى تنمرت عليها، طيب ما كان ممكن أتجاهلها بدلا من استضافتها للتنمر عليها، ثم لو هتنمر عليها فهل من المعقول أن أتنمر عليها فى لايف يراه الكثيرون؟
وختاما رفضت بوسي الرد على كل ما هاجموها وتناقلوا تصريحاتها، مؤكدة أن مثل هؤلاء يبحثون عن الشهرة وركوب الترند، وبالتالى لن ترد على إدعائتهم بحقها.
