إدوارد في مقدمتهم .. النجوم يُطلقون هاشتاج لدعم محمد سامي

انطلقت منذ قليلة حملة دعم للمخرج محمد سامي، وذلك بعد تعرضه لحملة تشويه من قِبل البعض ومن فنانين داخل الوسط، وشارك في الحملة عدد كبير من الذين عملوا مع سامي.

ونشر إدوارد عبر حساباته المختلفة على مواقع التواصل الاجتماعي : ادعم المخرج محمد سامي ضد حملة التشويه اللي بيقوم بها بعض الزملاء، وعلشان كدة بقول شهادة حق في المخرج محمد سامي .. أنا اشتغلت معاه واتعاملت في الشغل معاه، راجل بيحب شغله جدا وبيتعب كتير واتعامل معايا بكل احترام وحب، وبيحب الممثل جدا وبيطلع أحسن ما عنده، وعلشان محدش يقول علشان انا بشتغل معاه، الناس كلها عارفة إني بشتغل معاه ومع غيره ومش مستني شغل من حد الحمدلله، أنا تاريخي في السينما والدراما كبير وبشتغل مع ناس كتير، دي شهادة حق بس ولازم اقولها.

كذلك شارك أحمد فهمي في حملة دعم سامي، وذلك عن طريق نشر ستوري يؤكد فيها رفضه لحالة الشماتة التي أبداها البعض بعد إعلان القرار، مؤكدًا على النجاحات التي حققها الأخير.

نفس الأمر بالنسبة لمحمد مهران والذي دافع عن سامي قائلًا : الراجل ده مكناش صحاب شافني مره في المسرح في 2015، وقالي إننا هنشتغل مع بعض، ومشفتوش بعدها غير سنه 2020، لما اشتغلت معاه في مسلسل البرنس ومن بعدها بقينا نشتغل مع بعض، مشوفتش منه حاجة وحشة خالص، ومالوش معايا أي مصلحة شخصية وكان داعم ليا و لموهبتي بشكل كبير، وأي ممثل بيكون هدفه إنه يشتغل مع مخرج شاطر ومآمن بيه، ومظنش لما هتشوف c.v المخرج ده مش هتقدر تقول غير إنه مخرج مهم وشاطر وبيطلع من الممثل أفضل ماعنده

ونشر عماد زيادة تاريخ علاقته بمحمد سامي، وأكد على العلاقة الطيبة التي جمعت بينهما، كاشفًا إنه لم يرَ منه سوى كل الدعم والرقي والشهامة داخل لوكيشن التصوير وخارجه – بحسب وصفه -.

كما نشرت المخرجة كاملة أبو ذكري منشور على حسابها الشخصي على موقع فيسبوك، أعلنت خلاله دعم محمد سامي حيث كتبت : رضيت أو لم ترضَ، محمد سامي مخرج شغله بيعمل أعلى المشاهدات، أنا ماشفتهمش ومش دوري أنقد زمايلي فيه نقاد وجمهور، بس محمد سامي مخرج مسلسلاته بتعمل أعلى المشاهدات بما فيها نسل الأغراب.

كما شارك أحمد زاهر في حملة دعم محمد سامي، وأكد على أن الأخير كان أحد أهم الأسباب في التحول الفني في حياته، كما أنه شهد له على المستوى الشخصي، بأنه تعامل معه بمنتهى الود والرقي والاحترام.

وكان محمد سامي قد شارك في الموسم الرمضاني الماضي بمسلسل نسل الأغراب، والذي قام ببطولته أحمد السقا وأمير كرارة ومي عمر وإدوارد ودياب ومجموعة كبيرة من النجوم، وهو من تأليف وإخراج محمد سامي، وإنتاج شركة سينرجي.