رامي صبري : مش زعلان من ويجز لأنه لسه صغير ومعندوش خبرة فى الرد
أثارت أزمة تصريحات رامي صبري وويجز الجدل خلال الأشهر القليلة الماضية، حيث أبدى ويجز انزعاجه من حديث رامي عنه في أحد البرامج التلفزيونية، الذي أكد خلاله عدم فهمه لأغانيه.
رامي صبري يتحدث عن ويجز
وخرج رامي صبري منذ ساعات لتوجيه رسالة إلى ويجز، حيث قال في تصريحات تليفزيونية : كنت زمان بزعل وأنا قد ويجز كده وكنت بعمل أكتر منه، وعارف أن هو علشان لسه صغير ومعندوش الخبرة بتاعت الرد أوي فاهم دي، أنا أحبه جدا وليس لدي أي مشكلة معه، وأحب فنه وقولت ذلك من قبل.
وتابع : أنا معرفش هو ليه اتضايق كده، ممكن يكون حد سخنه، لكنه فنان مميز ويقدم موسيقى رائعة فعلا، وبقول كده على طول أنا مش ضد أي حد يعمل مزيكا، أنا أكتر واحد مش ضد أي حد، أنا دائما أقول أنه من حق أي فنان أن يقدم فنه بحرية طالما لا يأذي أحد.
بداية أزمة رامي صبري وويجز
وسبق وخرج ويجز للرد على رامي صبري بعد حديث الأخير في تصريحات تلفزيونية خلال الفترة الماضية عن نجوم الراب خاصة ويجز وتأكيده أنه لا يفهم كلمات أغانيهم، حيث شارك ويجز وقتها متابعيه عبر ستوري إنستجرام فيديو تحدث من خلاله عن رامي.
وقال ويجز ضمن الفيديو : هاتكلم على فنان فاكر أنه عنده صلاحية يطلع يتكلم في أي وقت على أي حد والناس تسمع وتسكت، الفنان ده اسمه رامي، رامي ده بقى كل لما يقعد 5 شهور يزهق يطلع يتكلم في التليفزيون على بتوع الراب والهيب هوب، طيب انت بتتكلم أمتى عن بتوع البوب اللي أنت منهم، على فنك ومجالك وكده.
وأكمل ويجز : أنا شايف أنك مبتفهمش في الراب ده حاجة، ولا بتفهم الكلام بتاعه زي ما انت قلت قبل كده، فا مش هتعرف تعمله أنا راجل مثلًا لو لقيت واحد بيعرف يسوق عجلة وأنا مبعرفش بحترمه ليه علشان هو عمل حاجة غير اللي أنا عملتها اشتغل على نفسه في حاجة أنا مشتغلتش على نفسي فيها.
واختتم : أنت مبتقدرش الفنانين دول شايفهم بيحاولوا يوصلوا لليفل انت فيه، في حين أنهم معدينك انت مش رقم 2 يا رامي انت رقم 19 مثلًا، انت بعيد أوي.
ماذا قال رامي صبري عن موسيقى ويجز ؟
وكانت بداية تصريحات رامي صبري عن ويجز عندما قال : ويجز زعلان مني ومش عارف ليه، أنا قلت إني مش بفهم كلامه ودي حقيقة بس قلت عليه إنه بيعمل مزيكا حلوة ومجتهد.
