ابنة بشير الديك : دخل الرعاية المركزة تاني وحالته رجعت تسوء
كشفت دينا ابنة السيناريست الكبير بشير الديك تفاصيل الحالة الصحية الحالية لوالدها، حيث كتبت عبر حسابها على فيسبوك : صباح الخير جميعاً، للأسف بابا دخل تاني الرعاية في إحدى المستشفيات، والمرة دي الموضوع بقى مختلف خالص، للأسف حالته بعد ما كانت بتتحسن شوية بقت ترجع تسوء تاني.
ابنة بشير الديك تتحدث عن تعرض والدها للإهمال
وأضافت : المشكلة في الإهمال وعدم الاهتمام بالمرضى، رحنا امبارح وقت الزيارة لاقينا بابا زاد عدم وعيه وذراعه وارم جداً وبيؤلمه وماحدش كان واخد باله والمفروض أنه في الرعاية.
وأكملت : المشكلة التانية أنه بقى لا قادر يمضغ الأكل ولا يبلعه، ده غير أنه كان جعان على غير العادة لأنه بالرغم من عدم قدرته على المضغ ولا البلع لكنه أول ما بدأ يأكل بدأ وعيه يزيد، إزاي دي رعاية، ومن كتر قلق ماما وعدم ثقتها في الخدمة المقدمة اللي هي مش رخيصة بالمناسبة بقت بتشوف الأدوية اللي بياخدها وبتعرف تأثيرها والآثار الجانبية بتاعتها وبدأت تناقش الدكاترة في الأدوية دي.
وواصلت : راح دكتور الرعاية المحترم المتواجد ساعتها قال لها لو مش قادرين على مصاريف المستشفى روحوا مستشفى تانية، هل ده رد محترم لدكتور رعاية في مستشفى معروفة بتميزها في الرعاية؟، الصراحة مش ده أول دكتور رعاية هناك يكون بالجليطة دي، وللأمانة الوحيدين المهذبين هناك دكتور صافي مديرة الرعاية ودكتور أحمد سامي دكتور الرعاية، وللأسف مش موجودين طول الوقت.
واختتمت ابنة بشير الديك : إن شاء الله نخرج منها على خير ونروح مستشفى تانية في أسرع وقت، برجاء الدعاء لبابا أنه يقوم بالسلامة ويخرج من النفق المظلم اللي هو فيه ده، آمين.
أزمة بشير الديك الصحية
يُذكر أن بشير الديك عانى من وعكة صحية خلال الفترة القليلة الماضية، قبل أن تبدأ حالته في التحسن ويعود إلى منزله، وسبق وصرح الديك لـ خبر أبيض : عدت إلى منزلي مؤخرًا وحالتي الصحية أفضل الحمد لله، وحاليًا أُحضر لأكثر من سيناريو جديد أعود به إلى الجمهور.
آخر أعمال بشير الديك
ويُعد آخر أعمال بشير الديك مسلسل الرسوم المتحركة الفارس والأميرة في عام 2020، وشارك به وقتها مدحت صالح ودنيا سمير غانم ومحمد هنيدي وماجد الكدواني وعبلة كامل وغيرهم.
