بيتر ميمي : التحضير للحشاشين احتاج مجهود ومشاهد المركب اتصورت في مالطا والمعارك اتعملت في مصر
حل المخرج بيتر ميمي وأبطال مسلسل الحشاشين ضيوفاً على برنامج كلمة أخيرة، تقديم الإعلامية لميس الحديدي على قناة ON وتحدثوا عن تفاصيل العمل الدرامي الأضخم في تاريخ الدراما المصرية.
وقال بيتر ميمي : إحنا في مصر كنا غير مؤهلين لهذه النوعية من الأعمال التاريخية، علشان كده التحضير للعمل كان محتاج مجهود كبير جداً لأننا بنبدأ من الصفر، وكريم لعب الدور من منطقة صعبة جداً، لأنه حتى الشخص الشرير لازم يكون له كاريزما لأن له أتباع كتير جداً، وتابع : أول قعدة لي مع المنتج تامر مرسي والشركة المتحدة سألتهم إنتوا عارفين المسلسل ده هيتكلف كام؟، وكان ردهم إنهم عايزين يعملوا صناعة مصرية كبيرة جداً تليق بينا.
وأضاف: صورنا 7 أيام في كازاخستان ويوم واحد في مالطا، علشان المشاهد تطلع طبيعية، وباقي العمل اتصور بالكامل في مصر، ورجعنا لكتب كتير جداً علشان نعرف شكل الملابس في إيران والأسلحة بتاعتهم وطراز المباني عندهم، وكنا بنفرق بين أصفهان بملابسها وأسلحتها والدولة الفاطمية بملابسها ومبانيها.
وتابع : اخترنا العامية المصرية لأن الوطن العربي كله فاهمها، كمان كل أبطال العمل مش من أصول فارسية مش عربية علشان يظهروا بيتكلموا عربية فصحى، ولو كان العكس كان ممكن يكون في مبرر إنهم يتكلموا العربية الفصحى، وكنا داخلين محضرين كل حاجة في العمل وعارفين إحنا عايزين إيه، وأكتر مشاهد كانت بتتنفذ بجرافيك مشاهد البحر والمركب واتصورت في مالطا، ووقتها قالولنا مستحيل تخلصوا تصوير في يوم، لكن إحنا خلصنا تصوير المشهد بالكامل في 8 ساعات فقط، وكل المعارك اتصورت في مصر.
قصة أبطال الحشاشين
مسلسل الحشاشين ينتمي إلى نوعية الأعمال التاريخية، ويتناول سيرة حسن الصباح مؤسس جماعة الحشاشين الإرهابية، والتي شكلت خطرًا على العالم في القرن الحادي عشر، واشتهرت بتنفيذ العمليات الإرهابية وقتل كل من يعارض دعوتها الشيعية.
مسلسل الحشاشين مكون من 30 حلقة، وهو من بطولة كريم عبدالعزيز، فتحي عبدالوهاب، أحمد عيد، نيقولا معوض، ميرنا نور الدين، إسلام جمال، سوزان نجم الدين، ميمي جمال، نور إيهاب، سارة الشامي، أحمد عبدالوهاب، وأحمد غزي، ويشهد ظهور عدد من ضيوف الشرف منهم محمد رجب وأمينة خليل وحسن مالك وغيرهم، ومن تأليف عبدالرحيم كمال وإخراج بيتر ميمي.
