كريم محمود عبدالعزيز : مقارنة هيثم زكي بوالده دمرته ومش عايز مراتي وبناتي يظهروا في الإعلام
تحدث كريم محمود عبدالعزيز عن والده وحقيقة وجود مشاكل بينه هو شقيقه محمد مع بوسي شلبي، بالإضافة لرأيه في المقارنة التي يضعها البعض له مع والده، وذلك خلال الجزء الثاني من لقائه ببرنامج أدينا بندردش، الذي تقدمه شيرين عرفة على حسابها بـ إنستجرام.
وقال كريم : مفيش مشاكل حصلت بعد انفصال والدي عن بوسي شلبي، وأنا ومحمد احترامنا لوالدنا زي ما هو بعد وفاته، ومش هينفع نعمل مشكلة مع أي حد في الدنيا ممكن تضايق أبويا.
وتابع : عمري ما هعمل مقارنة بيني وبين والدي، لإن مفيش حد هيبقى زي حد، وأنا مركز في نفسي، والناس اللي بتعمل مقارنات هي اللي دمرت هيثم زكي، وبعد وفاة والده وتجسيده شخصية حليم الناس بهدلوا هيثم زكي.
وأضاف : وفاة والدي أوحش حاجة في حياتي، وفي الوسط الفني لو وقعت يبقى خلص موضوعك ومفيش فرص تانية، وبعد فيلم اطلعولي برا حبست نفسي في مكتب أبويا، عشان مجابش الإيرادات اللي تخلي الجمهور يقول نثق في كريم وفضلت اسأل نفسي إيه الغلط اللي أنا عملته، وشخصية هوجان بالنسبالي كانت الفرصة الأخيرة ليا إني لو منفعتش في الدور ده أريح من التمثيل خالص.
وكشف السبب وراء عدم ظهور زوجته وبناته فى الإعلام، قائلا : مش عايز مراتي وولادي يظهروا تحت الأضواء وده لإن المجتمع مبقاش زي زمان وكل الناس بينتقدوا أي حد، ومش عايزهم يتجننوا بسبب الشهرة.
وعن آخر المرات التي بكى فيها، قال : آخر مرة عيطت فيها كان في العرض الخاص لفيلم موسى، لإن كان نفسي أبويا يشوف الفيلم.
