كواليس مشهد خطاب خالد النبوي في فيلم الديلر .. اتكلم روسي في أوكرانيا والمخرج فوجئ خلال التصوير
تتجه أنظار العالم خلال الوقت الحالي إلى الهجوم الروسي على أوكرانيا، خاصة مع وصول جيش روسيا إلى أعتاب كييف العاصمة الأوكرانية، غير أن هذا الهجوم استدعى إلى الأذهان، فيلم الديلر الذي عُرض عام 2010، وكان من بطولة أحمد السقا وخالد النبوي، وبالتحديد ذلك المشهد الذي تضمن خطابًا للنبوي باللغة الروسية.
وروى النبوي العديد من الأسرار عن كواليس تصوير العمل في أوكرانيا، وذلك خلال تصريحات تليفزيونية سابقة له، وقال : المشهد الخاص بالانتخابات في فيلم الديلر كان صعب جدًا، لأني كان المفروض أقوله بالروسي ما يقرب من 3 دقائق، وكان لازم البلد اللي هنروحها أتكلم بلغتها وكنا لسة مش محددين البلد، وعادة كنا بنعمل الحكاية دي فوتو مونتاج خصوصًا لو لغة صعبة زي الروسية.
وأضاف : اتفقنا إني هتكلم عربي عادي، والإنتاج متواجد بين التجمع الأوكراني علشان يشاوروا ليهم فيسقفوا ويهللوا وهيتحط على مزيكا وخلاص، والمخرج مش عارف أنا هعمل إيه ومحدش خالص عارف، وفجأة قال أكشن، لقوني بقول كلام غريب كتير، والناس بيهللوا لوحدهم وفيه صريخ لأن الكلام ليه معنى ليهم وهم فاهمينه.
وتابع : محدش كان مصدق، والحقيقة إني كنت روحت قبل التصوير بـ 3 شهور لواحد بيعرف روسي قولت له ترجملي الكلام، ولكن بعد ترجمته لقاني مش فاهم حاجة قولت له سجلّي، وبقيت حاطط السماعات في ودني طول ما أنا ماشي في أي حتة، ولما سافرت هناك دخلت مطعم وجربت أقول حتة لقيت الناس بتسألني : أنت بتتكلم روسي؟.
وفي سياق مختلف، يواصل خالد النبوي تصوير مسلسله الجديد راجعين يا هوا المقرر عرضه في الموسم الرمضاني المقبل، ويشاركه في البطولة كل من هنا شيحة، طارق عبدالعزيز، مصطفى درويش، إسلام إبراهيم، سلمى أبوضيف، أنوشكا، وفاء عامر، كريم قاسم، أحمد بدير، وهو قصة أسامة أنور عكاشة، وسيناريو وحوار محمد سليمان.
