شريف منير يدافع عن ابنته بعد قص شعرها : اللوك عجبنى ومبسوط منها وعمرى ما هاجى عليها علشان أرضيكم
دافع شريف منير عن ابنته أسما، وذلك بعد ظهورها في حفل مهرجان الدراما بالعلمين، حليقة الرأس تمامًا، حيث تعرضت للعديد من الانتقادات.
وظهر شريف في فيديو عبر حسابه بموقع انستجرام، وتحدث خلاله قائلًا : إيه الدوشة اللي إنتوا عاملينها دي وإيه الضجة اللي عاملينها دي، كل ده عشان بنتي قصت شعرها قدام الكاميرا، إيه الغلط اللي هي عملته، تصرف عادي جدًا مفيهوش أي حاجة، إوعوا تفتكروا إني هاجي على بنتي علشان خاطر أكسب رضاكم، دي بنتي اللي ماليش غيرها وبحبها.
وتابع : بالمناسبة اللوك اللي عملته عاجبني وأنا مبسوط منها أوي، بس قبل ما الإخوة السادة الملايكة الصالحين اللي عمالين يقلوا أدبهم ويشتموا، وبيقولوا تاخد التريند وجاتها البلاء في شكلها وبيقولوا أبوها معرفش يربيها، لا أنا بنتي متربية كويس جدًا بس هي بتتصرف باللي هي حاسة بيه، المهم إنها متكونش بتأذي حد.
وأضاف : قبل ما تتكلموا، بصوا على نفسكم واتفرجوا على عيلتكم وعلى إخواتكوا وعلى الناس اللي حواليكوا قبل ما تنتقدوا وتغلطوا وتقولوا متربتش بـ 3 تعريفة أو بربع جنيه تربية، لا أنا بنتي متربية كويس جدًا.
واستكمل : اللي حصل من بنتي مش غلط ومش عيب، هي مغلطتش في حد فيكوا، ومغلطتش في نفسها، وبعدين بنتي عندها 36 سنة وأم وعندها بنوتة ومسئولة عن نفسها، وأنا أب مسئول إني أحميها وهي حرة في تصرفاتها.
ووجه رسالة لابنته في الفيديو، قائلًا: أسما إنتي شكلك زي القمر وشكلك حلو جدًا وخدتي التريند برافو عليكي، متسمعيش كلام حد ومتهتميش بكلام حد وأنا مش مهتم بالكلام اللي بيتقال عليا ولا عليها، المهم إننا مش بنضر حد.
