دينا الشربيني : أكتر مسلسل حبيته في 2022 الليلة واللي فيها وبقيت بعرف أسيطر على مشاعري
تحدثت دينا الشربيني عن التغيرات التي طرأت على شخصيتها في العام الماضي 2022، وأكثر الأعمال التي نالت على إعجابها، وذلك خلال مداخلة هاتفية ببرنامج خلاص صحينا تقديم مارينا المصري على ميجا إف إم.
وقالت دينا الشربيني : أنا من الشخصيات اللي بتحب تصحى بدري، رغم إن العمل بالفن مواعيد التصوير فيه متغيرة ما بين الليل والنهار.
وتابعت : طلعت من 2022 بشخصيات كتير أثرت فيا، وإن شاء الله السنة الجاية تبقى أحلى، ومتفائلة جدا بـ 2023، والدرس اللي طلعت بيه من 2022، هو إني على قد ما بدي وقت لشغلي وحياتي لازم أركز برضه مع أهلي وأديهم من وقتي وطاقتي بشكل أكبر شوية.
أما عن الأعمال التي عرضت عام 2022 ونالت على إعجابها، قالت : أعمال كتير عجبتني السنة دي، بس أكثر عمل عجبني هو مسلسل زينة الليلة واللى فيها، و نفسي أسلط الضوء أكتر على الأطفال والمرأة، علشان كده عجبني جداً كمان مسلسل فاتن أمل حربي لنيللي كريم، أما عن أكتر أغنية انبسطت وأنا بسمعها السنة دي كانت إيه اليوم الحلو ده لأحمد سعد.
وأشارت إلى أنها لا تتابع السوشيال ميديا كما لا تحب كلمة تريند، مضيفة : أنا مش بتابع السوشيال ميديا، بس بحب التيك توك أوي، وكلمة تريند بالنسبة لي مرعبة، ومش بحبها أبداً، ونفسي أجرب الإذاعة جداَ، ووحشني أيام لما كنت مذيعة.
واختتمت قائلة : أكتر حاجة اتغيرت فيا السنة دي هي إن عصبيتي بقت أقل، ودي حاجة مش سهلة، لأني شخص عاطفي، وكل مشاعرى بتبان عليا، وأنا الحمد لله على طول كويسة نفسيًا، وبقيت أقدر أعمل كنترول على مشاعري، ومش بسمح لأي حاجة تزعلني.
