عمرو يوسف يدعم مستشفى 57357 : التبرعات قلت والحالة صعبة والجنيه بيفرق معاهم
حرص عمرو يوسف على دعم مستشفى 57357، من خلال فيديو شاركه مع جمهوره عبر صفحته الشخصية على إنستجرام، وحاز على تفاعل كبير من قبل متابعيه وعدد كبير من النجوم.
وقال يوسف : محدش طلب مني أعمل الفيديو ده بس صرح عظيم زي مستشفى 57357 بيقفل، المستشفى دي قائمة بشكل كبير على تبرعاتنا، وسمعت إن فرع طنطا قفل، وبقالي فترة بسمع إن المستشفى حالتها صعبة جدًا علشان التبرعات قلت، لغاية الموضوع ما زاد فحبيت أتأكد بنفسي.
وأضاف : فيه أزمة اقتصادية وكلنا كنا بنتبرع بس دلوقتي بقينا مش قادرين نتبرع مفيش مشكلة نتبرع لو كنت بـ 1000، خليهم 800 أو 500 ولو مش قادر خليهم 100، الجنيه بيفرق معاهم اللي تقدر عليه اعمله، أنا عندي تجارب شخصية لو عندي أي زنقة فلوس بطلع وبلاقي ربنا بيبعت على طول جربتها كتير ونجحت، وإنتوا كمان جربوها.
على جانب آخر، اقترب عمرو يوسف من الانتهاء من تصوير فيلم شقو، ويجسد خلاله شخصية إسماعيل البلطجي، الذي يرتكب عدة جرائم منها اقتحام أحد اليخوت وسرقة الألماظ الموجود على متنه، ويشاركه بطولته محمد ممدوح، يسرا، أمينة خليل، دينا الشربيني، عباس أبو الحسن، جميل برسوم، ووليد فواز، وهو من تأليف وسام صبري وإخراج كريم السبكي.
