غادة عبدالرازق : بطلت أبقى متهورة ولن أشارك في رمضان المقبل 2023

تحدثت غادة عبدالرازق عن شخصيتها وسبب قلة ظهورها في اللقاءات الفنية الفترة الماضية، وذلك خلال فيديو نشرته عبر حسابها على إنستجرام.

وقالت غادة : أنا مبعرفش أقف أمام كاميرا إلا وأنا بمثل بس، أنا خجولة جدًا ومبحبش أظهر كتير والناس بتفتكر إني مش كدة لكن الحقيقة إني خجولة جدًا، ولما بكون ضيفة في برنامج ساعات بكون حادة في الكلام، وده مش بيعجبني، علشان كده بفضل لما أقف قدام الكاميرا أكون في شغلي وبمثل بس مش أى حاجة تانية.

وتابعت : نفسي الستات ترجع تعمل بطولات مطلقة في السينما، وياريت النجومية متبقاش متحددة بس على بطلة قدام بطل، والأيام دي بقى في أعمال كتير نجومها كتيرة مش بس نجم ونجمة ودي حاجة أنا حباها، وياريت نرجع نعمل أعمال زي جعلوني مجرمًا أو باب الحديد، أعمال تكون هادفة وفي نفس الوقت مسلية للجمهور.

كما كشفت موقفها من المشاركة في الموسم الرمضاني المقبل 2023، وقالت : لن أشارك في أي مسلسل، أما عن شخصيتها وما تغير فيها خلال الفترة الماضية، قالت : بقيت بركز في الحاجات اللي تنفع أهلي وعيلتي، ومبقتش باخد الأمور على أعصابي، وبطلت أبقى متهورة وبقيت أسمع الكلام أكتر.