والد حسام حبيب : إبني مش راجل وتربية ست .. وحسام يرد : أمي بـ 100 راجل
أثار والد حسام حبيب جدلًا واسعًا في الساعات الأخيرة بعد هجومه على نجله عبر حسابه على فيسبوك، حيث شارك منشورًا أكد فيه أنه خالف شرع الله ولم يستشيره في كواليس خلافه مع شيرين عبدالوهاب، كما وصفه بقاطع صلة الرحم وعاصي أبوه، كما وصفه في تصريحات أخرى بأنه تربية ست وليس تربية والده، وذلك بعدما خرج حسام حبيب عن صمته في مداخلة أجراها بالأمس في برنامج الحكاية مع عمرو أديب.
ورد حسام منذ قليل، على والده عبر ستوري على إنستجرام، كتب خلالها : أنا ليا الشرف إني تربية ست، لأنها بـ 100 راجل، وتربية الست دي هي اللي هتخليني مردش عليك، وحسبي الله ونعم الوكيل.
وكان والد حسام قد سبق وكتب في منشوره عن أزمة نجله مع شيرين : قولوا الحق ولو على أنفسكم، هو ينفع أخالف شرع ربنا بحجة إني أحمي أولادي البنات؟، ليها الثلثين والأهل ليهم الثلث بعد عمر طويل، وده يخلي الأهل راضيين ويراعوا البنات بعد عمر طويل، ودي صلة رحم وغير كده يزرع العداوة بين الأهل، أنت كده مش بتحافظ على مال زوجتك، أنت بتخالف شرع ربنا.
وأكمل : النتيجة إنهم فضحوها وقضوا على مستقبلها، وزرعت العداوة بينهم، وحطمت زوجتك بجهلك بشرع ربنا، ولو كنت بتسأل أبوك كان أرشدك للحق، والكل طلع كسبان يا قاطع صلة الرحم وعاصي أبوك، ضيعت نفسك وضيعت البنت معاك.
وكان قد كتب في منشور سابق : بتقول إنك عمرك ما أخدت منها فلوس، ومبتشتغلش من 4 سنين، كنت عايش على قفا مين، وهي قالت لي يا بابا أنا عايزة أتجوز راجل يصرف عليا، وقولتله عايزك تشتغل وتصرف على بيتك علشان تكبر في نظر مراتك وتحترمك الحب وحده لا يكفي.
وواصل : أخدت مني مليون جنيه علشان تشطب فيلتك وهتعيش في بيت مراتك، ومن ساعة ما اتطلقت وأنا بصرف عليك ورايح تقول لـ عمرو أديب وتهاجمني لتاني مرة إنك ماتعرفنيش من 14 سنة، آه ما بتعرفنيش إلا للمصلحة، وعلشان تاخد فلوس، وما دخلتش بيتى سبع سنين وجيت بس تاخد فلوس. وقلت ما بتشتغلش علشان شيرين ومشاكلها كانت شاغلاك بقالك سنة مطلقها ما اشتغلتش ليه بطل حجج، وخليك راجل أنت فعلًا مش تربيتي، تربية واحدة ست، طلعت من بيت مامي على بيت مراتك؟.
