محمد كريم : محمد صلاح ملهم وبيدينى دفعة قوية وبروس ويلز أحرجنى بتواضعه وبساطته
تحدث محمد كريم عن الدور الذي يلعبه محمد صلاح في حياته، بالإضافة لحديثه عن علاقته بالنجم العالمي بروس ويلز، والذي تعاون معه في فيلم A Day to Die.
وقال كريم خلال استضافته ببرنامج الحياة اليوم، المذاع على قناة الحياة : محمد صلاح بيديني دفعة معنوية دايما، لإننا لما بنكون مسافرين برا بنحس بضغوطات كتير ومحدش بيقولك حاجة ولا بيكون معاك حد، وبتشق لنفسك طريق عشان تعمل لنفسك نجاح، وبنكون لوحدنا كتير وبتفضل تسأل لنفسك هل اللي أنت بتعمله ده صح ولا لا.
وتابع : ما عنديش مانع أبدا أنى أعمل أفلام ومسلسلات في مصر، وفيه حاليا فيلميين معروضين علي، وممكن أعمل واحد، لكن مش عارف هقدر ولا لأ، لأنى مرتبط بفيلم في أمريكا.
وأضاف: نفسى أقعد مع المسئولين في مصر، لأنه لازم يكون عندنا أفلام موجودة بتتصور في مصر، ويكون عندنا هوليوديين طول السنة، ولما اشتغلت مع بروس ويلس كنت مخرج من دماغي خالص أنيى بمثل مع بروس ويلس، وهو كان بيحرجني بتواضعه، وكان بيدينا دروس، لأنه بيتكلم معاك وبيعاملك أن أنت النجم مش هو، وقبل ما أجي روحنا زرناه أنا واتنين من الكاست بسبب ظروف مرضه.
وأكمل : في أمريكا هناك حماية للممثل والكاتب والمخرج، بطريقة رهيبة جدا، والنقابة هناك تضمنلك أن كل ما الفيلم يتعرض في مكان يجيلك أجرك حتى منزلك، في أمريكا الممثل والكاتب شريك في العمل، لكن في مصر الممثل بياخد أجره مرة واحدة.
