رانيا محمود ياسين : ظلمت نفسي لما بعدت عن الفن وأستحق البطولة وعجبني مكى فى رمضان

شاركت رانيا محمود ياسين مؤخرا في مسلسل انحراف والتى نافست به روجينا في السباق الرمضاني 2022، وأشاد الجمهور والنقاد بدور رانيا في العمل.

وتواصل خبر أبيض مع رانيا محمود ياسين والتى قالت في تصريح خاص : شاركت في مسلسل انحراف وكان لدوري تأثير قوي، ومساحة الدور لم تكن كبيرة، ولكني أخلصت في تقديمه واجتهدت في تقمص الشخصية.

وتابعت : أنا بكره المظلومية، علشان كده مابحبش أطلع كل شوية أقول اتظلمت، وآه فعلًا كنت مظلومة في وقت معين، لكنى ظلمت نفسي لما بعدت وانشغلت ببيتي وجوزي وولادي، بس خلاص بشتغل دلوقتي وبعمل كل اللي أقدر عليه، وبختار الدور اللي ليه تأثير في العمل.

وأضافت : أستحق أدوار البطولة، وحقي أستعيد مكانتي، ولكن حسابات السوق في غاية السوء، واللي بيهمني حب الناس، وإني أجتهد وأفضل أحاول.

وعن رأيها في الأعمال الدرامية التي عرضت في السباق الرمضاني الأخير قالت : كنت مشغولة معظم الوقت بسبب تصوير مشاهدي في مسلسل انحراف، ولكن تابعت الاختيار 3 زي كل سنة، وهو عمل رائع وأفخر به، وتابعت كذلك مسلسل جزيرة غمام، وبطلوع الروح، وهى أعمال عظيمة فعلًا، وعجبني الكوميديا جدًا السنة دي، خصوصا مكي وأكرم عاملين حاجة حلوة أوي.

وعن عودة والدتها شهيرة للفن قالت : حاجة ترجع لها أكيد، بس أعتقد العائق الوحيد إن لسه فيه كورونا، ماعتقدش ممكن ترجع في الظروف دي.

واختتمت : ماما كانت دايمًا بتدعم الفن، حتي في فترة اعتزالها، وكانت الداعم الأول لبابا الله يرحمه ولي ولعمرو، طول عمرها بتحب الفن وممكن ترجع طبعًا.