حنان ترك : أنا مش داعية إسلامية وجاهلة سياسيًا وأصحابي زعلوا مني على كلام مقولتوش
خرجت الفنانة المعتزلة حنان ترك، لأول مرة في بث مباشر على صفحتها الشخصية بموقع فيسبوك، وتحدثت للمرة الأولى مع جمهورها وظهرت غاضبة في البث المباشر من بعض الأمور التي أزعجتها ونُسبت إليها.
وقالت حنان : استحملوني واستحملوا صوتي لأن عندي دور برد، وكان مفروض أطلع من الأسبوع اللي فات أقول الكلام ده، وتابعت : عايزة أشكركم وأشكر أسرتى اللى وقفت جنبى وقت مرضى، وكل أصدقائى اللى بيسألوا عليّ، ودكتور أشرف زكي كان بيكلمنى وبيطمن عليّ، وبشكر الجمهور اللى بدعواته الحمد لله بقيت أحسن بكتير وكويسة جدًا، ومش عارفة أشكركوا على إيه ولا إيه، وسعيدة إنى معاكم وانتوا وحشتونى جدًا.
كما طلبت من جمهورها أن يساندها قائلةً : عايزاكم تساعدونى على أى حد بيتكلم بإسمى، أنتوا اللى تقفوا لأنكم عارفين حنان ممكن تقول إيه ومتقولش إيه، لأن كان في صفحات كتير بإسمى بيتكلموا فى الدين وفى السياسة، وأنا مليش علاقة بيها وعمرى ما أنزل بوستات بالشكل ده.
وأضافت : أى حاجة نزلت على لسانى ويقولوا حنان قالت فتوى وإن ربنا غضبان على فلان، أنا ماليش علاقة خالص، أنا لا بحرم ولا بحلل، ولا الكلام ده له أى علاقة بيا، وأنا مقدرش أفتي في دين ربنا، وده له ناسه، ونصيحة لكل الناس، لما تحب تاخد نصيحة خدها من أهل العلم والناس المسؤولين عن الفتوى ومصرح لهم بها.
وختمت حديثها قائلة : أنا جاهلة جدًا سياسيًا، ومعنديش وعى سياسى أنى أعرف أقول اعملوا حاجة أو متعملوش، ومعنديش الثقافة اللى تخلينى أنظّر سياسيًا، أما بالنسبة للدين أنا درست علوم شرعية على سبيل النجاة لا على سبيل الدعوة، والدعوة دى موضوع كبير جدًا، ومحتاج علم وفقه مش أي حد يقدر يعملها، أنا فين والكلام الكبير ده فين!.
