زوجة أحمد السعدني في بطلوع الروح : اشتغلت موديل ومساعد مخرج ونفسى أخرج فيلم عن المرأة

حلت هاجر السراج ضيفة علي gossips عبر اليوتيوب، وكشفت عن تفاصيل حياتها الشخصية وبداية مشوارها الفني، وكذلك دورها في مسلسل بطلوع الروح لـ منة شلبي وأحمد السعدنى والتي شاركت به في السباق الرمضاني 2022.

وقالت هاجر : أنا اتولدت في القاهرة وعشت فيها كتير، وبابا وماما سوريين، وبعدها سافرت أمريكا لوحدي وكنت فى سن 17 سنة ودرست film making، وكان السبب إن من صغري بشوف أفلام أبيض وأسود ومسلسلات وبتعلق بيها، يعني ماكنتش بشوف كارتون مثلا، وحسيت إني عايزة أدرس حاجة ليها علاقة بالفن.

وأضافت : رجعت لمصر واشتغلت مساعد مخرج لمسلسلات، وإعلانات، وأفلام قصيرة، وفهمت وشفت العلاقة بين المخرج والممثل وحبيت وقتها يبقي مكاني قدام الكاميرا، فقررت أدرس تمثيل.

وتابعت : بدأت أدرس تمثيل في 2017، وروحت ورش تمثيل كتير جدا، وإختبارات بس ماكنتش بنجح، وده سببلي توتر ومكنتش واثقة في نفسي، واشتغلت موديل بالصدفة وبشكل ودي لصاحبتي وبعدها جالي حاجتين كمان وصورتهم، وبعدها جه دوري في مسلسل بطلوع الروح.

وعن حلمها قالت : بحلم يجيلي منحة من أي جهة مهتمة بالسينما لإخراج وتأليف فيلم، عن قضايا المرأة.

وعن اختلاف شخصيتها الحقيقة بشخصية لينا التي لعبت دورها في مسلسل بطلوع الروح أمام أحمد السعدني قالت : لينا قررت تسيب أهلها وتتجوز شخص بتحبه وتمشي ورا ولكن هاجر مش هتعمل كده بس لينا وهاجر عنديين ومابيهتموش برأي الناس ولكن لينا متسرعة.

كما كشفت هاجر عن الكثير من الحقائق عنها وقالت : أنا بحب السفر جدا، وبستفيد منه وبتعرف علي ناس جديدة وأؤمن بالحب من أول نظرة وبحاول أفرمل نفسي بس بيبقي صعب، وأنا شخصية صريحة جدا ولا أجمل الحقائق.