نيللي كريم عن فاتن أمل حربي : متخيلتش إن المسلسل يعمل الضجة الكبيرة دي ومشاهد المحكمة كانت الأصعب

كشفت نيللي كريم عن كواليس مسلسل فاتن أمل حربي وذلك من خلال مداخلة هاتفية لبرنامج من مصر مع الإعلامي عمرو خليل، والمذاع علي cbc.

قالت نيللي : الفكرة كانت لـ ماندو العدل وبعدها كتبه إبراهيم عيسى، وأنا مابقدمش قضية .. أنا مع فكرة تقديم عمل درامي يحتوي على أحداث وقصة جديدة وجيدة، ومن خلال القصة بيكون فيه قضية مش العكس، يعني مش بعمل قضية وبعدين أعمل الحدوتة، ولازم المشاهد يبقى مستمتع وهو بيتفرج.

وأضافت نيللي : متخيلتش إن المسلسل يعمل الضجة الكيبرة دي، ومتابعتش ردود فعل الجمهور في أول أيام عرض المسلسل علشان كنت مركزة في التصوير، وبالنسبة لحالة الجدل فطبيعي تبقى موجودة، بس اللي فرحني فعلا إن ستات كتيرة بتقول دي قصتي.

وتابعت نيللي كريم : أكيد الرجالة مظلومة في قوانين معينة زي الستات، ولكن المسلسل بيعرض قصة نسائية وبالتالي المشاكل اللي بيطرحها المسلسل كانت نسائية أكتر، وأكيد نفسي نعدل القانون علشان يحكم بالعدل للراجل والست.

وعن أصعب المشاهد التي واجهت نيللي في المسلسل قالت :  مشاهد المحكمة كانت صعبة عليا، خاصة مشاهد المواجهة، وتأثرت بآخر مشهد في الحلقة الأخيرة من المسلسل.