يسرا : فكرت فى الانتحار وعمرى 11 سنة وجالي اكتئاب بعد ما فقدت جنيني
كشفت يسرا عن تفاصيل ما حدث معها بعد خسارتها لجنينها خلال السنوات الماضية، وتجربتها مع الانتحار وكيف تعاملت والدتها مع ذلك الأمر، وذلك خلال الجزء الثاني من لقائها مع شيرين عرفة في برنامج أدينا بندردش.
وقالت يسرا : كنت مضايقة وتعبانة وجالي اكتئاب لفترة بعد فقدان جنيني وده بيحصل لأن كل طبيعة جسمك بتتغير وأنا مش بعدي من الأزمات بسرعة ولكن باخد وقتي في الحزن عشان أخف منه، لكن مش بحب النكد.
وتحدثت عن زوجها خالد سليم، قائلة : الجواز قرار مهم، وبقالنا سوا 26 سنة وربنا عوضني بخالد، في الأول اتخضينا من بعض شوية ويمكن ده حصل عشان إحنا كنا أصحاب، وأطول مرة انفصلنا فيها كانت 4 شهور، وعمري ما عرفت أغير حاجة في خالد ولا هو كمان عرف يغير حاجة فيا.
أما عن تجربتها مع الانتحار، فقالت : أمي عرفت تربيني وشوفت قدامي ست بتمر بأزمات كتيرة وعمرها ما بينت كسرتها لمخلوق، ولما فكرت انتحر كان عندي 11 سنة، وقتها كنت هبلة وسقطت في الترم وكنت خايفة منها فروحت دخلت الحمام وبلعت برشام، وأمي عرفت فكلمت الدكتور وسألته .. هل هموت ؟ فقالها لا، فقالته يعني لو سبتها مش هتموت ؟ فقالها لا بس تابعيها كل شوية وهي هتنام يومين، وبالفعل سابتني نايمة، ومكنتش أعرف إن الانتحار حرام غير لما جربت.
واختتمت خلال اللقاء : مش بحب اتظلم ولو عندي حق هدافع عنه وصوت الحق عالي ومش هنتقم لإن ربنا اللي بينتقم لي، وبخاف من أحلامي لإنها كتير بتتحقق.
