يسرا : أبويا كان بيتكلم وحش عن أمى وسامحته لأن عقاب ربنا أكبر من عقابي

حلت يسرا ضيفة على برنامج أدينا بندردش، مع شيرين عرفة والذي يُعرض على حسابها الشخصي بموقع إنستجرام، وتحدثت عن أصعب الفترات التي مرت بها في حياتها، بالإضافة لأزمتها مع والدها وعلاقتها بوالدتها.

وقالت يسرا خلال اللقاء : أنا نمت وقمت كل حاجة راحت مني، والحياة اللي كنت عايشاها مع ماما راحت، وده حصلي في سن 14 سنة لما بابا خدني من ماما، ورجعت سبته وأنا عمرى 21 سنة، لإن ده السن القانوني ودول كانوا أصعب 7 سنين فى حياتى، ولولا إني كان عندي إيمان إني هخرج من ده ماكنتش هخرج من الفترة دي، ولما خرجت وسبته ابتديت من الصفر، ومكانش عندي أي حاجة في الدنيا، وقررت إني لازم أعتمد على نفسي وأشتغل.  

وتابعت : أنا مسامحة كل الناس، لإن أكيد عقاب ربنا أكبر من عقابي، ومفكرتش مرة أعاتبه أو أسأله ليه كان بيعمل معايا كدة ليه، وأمي مكانتش مخلياني أحس إني ناقصني أي حاجة وكانت أمي وأبويا في نفس الوقت، وحسيت بالنقص لما روحت لوالدي.

وأضافت : أمي عمرها ما كانت بتقولي كلمة وحشة عن أبويا ولكن أبويا كان بيقولي كلام وحش عن أمي ومكنتش بصدقه، وعمري ما شكيت للحظة في مدى حبي ليها وإني هرجعلها وهي هترجعلي، واللي قواني في الوقت ده علاقتي بربنا لإني ماكنش عندي أصحاب أو حد قريب مني.

وتحدثت عن رأيها في مصطلح سن اليأس، قائلة : كلمة سن اليأس غلط خالص، والراجل برضة بيوصل لسن اليأس ولكن الست بتكون مؤهلة لده لإنها بتبقى عارفة إنها مرحلة هتحصل، ولكن اليأس الحقيقي بيكون نابع من جوا، والراجل في المرحلة دي بيتجنن أكتر.

واختتمت : فكرة غلط عند الست إنها تخجل من إنها تكبر في السن، ولكن مش هي دي الحياة، والناس مش فاهمة إن في ست بيحصلها ده في التلاتين، ولكن ده مش معناه إنها ست كبرت، وحرام إن حد يدوس على الست بالمعنى ده وبعدين الطب خلى كل حاجة أسهل وأحسن، وأنا بحب الحياة وبحب استمتع بكل نعمة ربنا إدهالي.