عمرو يوسف : تعبت نفسيًا بسبب أزمة أحمس والإنجاب أثر على كندة ونفسي أشارك في مسلسل الاختيار
حل عمرو يوسف، الليلة، ضيفًا على برنامج حبر سري، الذي تقدمه الإعلامية أسما أبراهيم على شاشة القاهرة والناس، وكشف عن سبب إيقاف مسلسله أحمس، الذي كان من المفترض عرضه في الموسم الرمضاني الماضي، كما تحدث عن زوجته كندة علوش وابتعادها عن الفن بسبب الإنجاب، وتطرق لمسلسل الاختيار.
وقال عمرو : فضلت إني متكلمش وقت أزمة مسلسل أحمس، علشان الكلام زاد وقتها أكتر من اللازم، وأغرب الشائعات اللي طلعت وقتها إني لم أوافق على حلق ذقني، وأعطت انطباع خاطئ عني حول فهمي لمهنة التمثيل، والكلمة دي ضايقتني لإن معنى كده إني مش ممثل محترف.
وتابع : حصل بعض الاعتراضات بعد طرح البرومو والمخرج حسين المنباوي كان عامل شغل رائع في العمل، لكن الناس معجبهاش الموضوع وشركة الإنتاج قررت توقف المسلسل، وأنا بحب دايمًا أنافس نفسي ومش بحس إني محتاج أكون أحسن من حد.
وأضاف : معظم زملائي كانوا بجواري في هذه الأزمة، وفي الوقت ده كنت مضايق جدًا لإني عملت مجهود كبير ونفسيًا كنت تعبان، ومش زعلان فقط على مجهودي ولكن على مجهود باقي الناس، والأمل دايمًا موجود ولكن مفيش حاجة في إيدي.
وعن زوجته كندة علوش، تابع قائلًا : كندة عاقلة جدًا ومتفهمة طبيعة عملي، والإنجاب أثر على مشوارها الفني وهي اختارت إنها تقعد وتربي حياة بنتنا، وهي نجمة لها جمهور كبير في الشارع المصري، ولم أشعر بالذنب إني أثرت على مشوارها الفني، والإنسان بيبقى عارف إن في مسؤولية تضاف على حياته ودي أحلى مسؤولية.
ورفض يوسف كلمة -تريند- واستخدامها بكثرة كمقياس للنجاح، وقال : أنا بعيد عن السوشيال ميديا ومقدرش أركز فيها، لأني لو ركزت هنسى شغلي، وكلمة تريند بتوجعلي ودني، وبالنسبالي زي كلمات حقد وغيرة وشر، والتريند خلى الناس تتجنن وبقيت بشوف مهازل، وللأسف النجاح حاليًا يقاس بالتريند.
وعن مسلسل الاختيار أضاف : مسلسل مهم جدًا وسعيد بأجزائه الثلاثة، ونفسي يفضل مستمر، وهو يعبر عن القوة الناعمة ودورها في توصيل رسائل مهمة، ونفسي أشارك به ولكن متعرضش عليّ لحد دلوقتي.
