دينا الشربينى : واجهت شائعات غير طبيعية بسبب عمرو دياب ودخلت المستشفى بسبب السخرية منى فى مهرجان الجونة
عُرض اليوم الجزء الأول من حلقة دينا الشربيني، ببرنامج أدينا بندردش، والذي تقدمه شيرين عرفة عبر حسابها بموقع إنستجرام.
وتحدثت دينا الشربيني خلال اللقاء عن حياتها الشخصية وكيف تستقبل الانتقادات التي طالتها خلال الفترة الماضية، بسبب علاقتها بعمرو دياب، قائلة : نفسي الناس تبطل تحكم عليا لإنهم ميعرفونيش ولكن الحمد لله إن الناس هادية عليا دلوقتي شوية، وأنا بمثل في شغلي ومعنديش طاقة أمثل في حياتي.
وتابعت دينا الشربيني : بحكي أي حاجة عني لأي حد والقريبين مني بيستغربوني، مضيفة : بابا كان دايما مسافر وأنا كنت متعلقة به، لذلك أصبحت بالنسبة لى فكرة إن حد ماشي مش بحبها، ولما ذهبت لطبيب نفسي هو اللي اكتشف الأمر ده.
وذكرت إحدى المرات التي تأثرت فيها بالانتقادات، حينما كانت تتواجد في مهرجان الجونة، قائلة : وقت مهرجان الجونة تعبت ودخلت المستشفى بسبب سخرية البعض مني حينها، خاصة إني قبلها كنت عايزة أخس وخدت دواء لإزالة المياة الزائدة من جسمي بدون استشارة الطبيب ولكنه أتعبني.
أما عن علاقتها بالسوشيال ميديا وهل تقرأ التعليقات التي تُكتب عنها فقالت : عندي علاقة غريبة مع السوشيال ميديا وخدت قرار إني مش عايزة أعرف الناس بتقول عني إيه، ولما بيحصلي مشكلة كبيرة في حياتي بلاقي نفسي بصحى من النوم ومحتاجة أشرب مياة، بقول الحمد لله.
وذكرت السبب وراء عدم تحدثها عن علاقتها بعمرو دياب وسبب انفصالهما، قائلة : بعد الانفصال معلقتش عشان لما كنا سوا كنت بتكلم عن حياتي وحياته لإننا كنا مع بعض، ولكن بعد الانفصال إزاي كنت هطلع أتكلم عن حياة شخص تاني مش بقينا مع بعض خلاص وحياته تخصه هو بس، وهو بني آدم محترم وناجح جدا وكل واحد أكيد بيفتكر الأيام الحلوة.
وسخرت الشربيني من كم الشائعات التي طالتها خلال علاقتها بالهضبة، قائلة : طلع عليا كم شائعات بشكل مش طبيعي زي إني كنت حامل 4 مرات ومش عارفة جابوا الكلام ده منين.
واختتمت حديثها : جاهزة أحب تاني لإني بحب الحب ولما ميحصلش نصيب الإنسان بيكون أقوى، وأنا نحنوحة أوي وشخصية غيورة بنسبة 1% حاليا.
