محمد صلاح : كنت بنام ورا بوابة نادي المقاولون وكنت بتكسف أطلب فلوس من والدى رغم احتياجي

واصل محمد صلاح، نجم منتخب مصر وفريق ليفربول الإنجليزي، حديثه مع برنامج صاحبة السعادة، الذي تقدم إسعاد يونس على قناة dmc، وكشف عن علاقته بعدد من اللاعبين، وبدايته مع كرة القدم.

وقال محمد صلاح : المقاولين العرب من أحسن الأندية اللي بيطلع ناشئين في مصر، وعديت بمواقف كتير صعبة، وفي مرة كنت رايح القاهرة ولاعب صاحبي قالي هنبات عند خاله، ووالدي إداني 60 جنيه، ولما روحنا هناك لقينا خاله مش موجود، بعدها قاللي يعرف حد في الإدارة، وفرشنا وقتها في الأرض وكنت بنام ورا البوابة، وبصحى 6 الصبح قبل ما حد ييجي، تاني يوم بيتنا في ملعب 2، لأنهم كانوا بيعملوا حاجات عند البوابة، وبعدها الموضوع اتحل، ولما يفتكر المواقف دي بتبسط.

وأضاف : مكنتش بحس بأي معاناة لأني كنت مستعد أعمل أي حاجة علشان أحقق حلمي مع كرة القدم، واهم حاجة كابتن ريعو ميعرفش إني ببات في النادي علشان العامل ميتأذيش، وبعدها الإدارة سمحت لي أبات في الاستراحه.

وتابع : كنت بتكسف آخد فلوس من والدي رغم إني كنت محتاج، وهو حالته في المادية كويسة، وحاليًا بدي كل حياتي الكورة دلوقتي علشان لما أعتزل أقول ده فصل واتقفل.