يحيى الفخراني : فاتن حمامة رشحتني لبطولة أرض الأحلام ورفضت المصير بسبب الأفيش والأجر

واصل الفنان الكبير يحيى الفخراني حديثه مع برنامج صاحبة السعادة، الذي تقدمه إسعاد يونس، عبر قناة dmc، وكشف عن كواليس عدد من أهم أعماله التي قدمها على مدار مشواره الفني.

وعن مشاركته في فيلم أرض الأحلام قال : عرفت أن فاتن حمامة هي من رشحتني للفيلم، وعندما سألتها ليه رشحتيني أنا قالت : علشان عايزة أعمل دور حلو، وتابع : أول يوم تصوير قالوا لي مدام فاتن عايزاك، وقالت لي هتعمل مكياج، قولت لها لا، لكن لما عرفت طبيعة المشهد اللي بعاكسها فيه، شيبت شعري علشان المشهد يبقى مُقنع.

وأضاف : كنت مرشح لبطولة فيلم المصير، وأعتقد أن خالد يوسف هو من رشحني، وعندما قابلت المخرج يوسف شاهين عرض عليّ الفيلم وقالي إقرا السيناريو، ولما قريته قولتله عايز إعادة صياغة حوار، ووافق على كده، ولما سألني عايز كام قولتله اللي بتدفعه، ولما روحت علشان أمضي قالولي هو جاي في الطريق، ولما بصيت على الأفيش وانا قاعد على مكتبه لقيت لشاب صغير لسه جديد متصدر الأفيش، ولما جه قولتله ده إيه قالي هنخلي إسمك الأول وقال بعدها : بس هننقلل الأجر شوية، قولتله خلاص هفكر، وطلع ورايا لحد الأسانسير، وبعدها خالد يوسف قاللي معلش.

وتابع : اعتذرت أيضًا عن مسلسل أرابيسك، علشان كنت لسه عامل زيزينيا وبعده مسلسل لا، وكنت عايز أفصل بعمل بعيد عن أسامة أنور عكاشة، وصلاح السعدني عمله كويس.