آدم الشرقاوي : اشتغلت سواق أوبر وكنت عايش على البقشيش عشان أدفع الإيجار

حل آدم الشرقاوي ضيفا علي إسعاد يونس في برنامج صاحبة السعادة أمس، وتحدث عن حياته وطفولته في أمريكا، وعمله قبل التمثيل، وأيضا أول تجربة تمثيل له.

وقال آدم عن حياته في أمريكا : أنا كان نفسي أرجع مصر، وأرجع لصحابي، ولما ركبنا الطيارة نسيت لعبتي اللي بحبها، وكنت فاكرنا راجعين مصر تاني، بس دا محصلش.

وتابع : أهلي أخدوا منحة سفر لأمريكا لأنهم شافوا الفرص برا مصر أحسن، وبعد فترة اتعودت على الحياة هناك، بس وأنا صغير كنت بهرب من البيت كتير، علشان كنت عايز أشوف الحياة وألعب في الشارع، ومكنتش بحب قاعدة البيت.

وتحدث آدم عن طفولته قائلا : مكنتش بعمل واجباتي المدرسية، وهوايتي كانت كرة القدم الأمريكية، وقعدت 7 سنين بلعبها، بس بعد فترة نسيت موضوع ده، علشان كان لازم أشتغل، ومكنتش بروح الجامعة غيرعشان محاضرات التمثيل، وكنت مهتم وبذاكر وأروح بدري، وبمرور الوقات حبيت الموضوع أوي.

وكشف آدم عن عمله قبل التمثيل وأول تجربة سينيمائية له وقال : بابا علمني إزاي أشتغل وأجيب فلوس، وإشتغلت في مطاعم كتير أوي وكنت عايش على البقشيش عشان أعرف أدفع الإيجار، وده علمني أشيل المسئولية من بدري، وكمان اشتغلت سواق أوبر وبالصدفة قابلت شخص غريب وعرض عليا إني أمثل، وقالي لو وافقت أكلمه ونعمل تجارب أداء، وكلمته فعلا وشاركت في فيلم اسمه Low Low في 2019، والحمدلله من بعدها بدأت مسيرتي.