تامر حسني : كنت بفتح القميص تأثرًا بأحمد رمزي ونفسي أكون فنان شامل

حل تامر حسني اليوم، ضيفًا على برنامج معكم، الذي تقدمه الإعلامية منى الشاذلي، على قناة cbc، وبدأ اللقاء بتقديم أغنية حلو المكان، التي قدمها من قبل في فيلم الفلوس.

وقال تامر حسني في حديثه : في بداية السنة الجديدة أتمنى للجميع يحققوا أحلامهم، وتابع : بحاول أفرح الجمهور في حفلاتي، مهما كان الموضوع مكلف ومجهد، وكمان لو حد شاف الحفلة من برة مصر يعرف إحنا وصلنا فين، وده أسلوبي في كل حفلاتي داخل وخارج مصر، لأني قررت أبقى مختلف.

وتابع : طول عمري بحلم أبقى فنان شامل، وأخدت جائزة من أمريكا لأني بكتب وبلحن وبغني وبخرج وبمثل، وكمان أنتجت بعض أعمالي، وببقى مستمتع وأنا بعمل شغلي، حتى في الأفراح، المفروض بنغني ساعة إلا ربع، لكن أنا ممكن أغني ساعتين طالما الناس مبسوطين.

كما أشار إلى أنه يستفيد من الأراء السلبية قبل الإيجابية، ويهتم بانطباعات الجمهور، ويتراجع عما قد يزعجهم، مضيفًا : الحاجات السلبية بسمعها كويس جدًا عشان أطور نفسي لأن أنا شغال عشان الجمهور، ومينفعش أعاند وأشوف بيتضايقوا من إيه واروح أعمله أو أصمم عليه.

وعن الأمور التي غيّرها في نفسه بناء على رأي الجمهور، قال : أول ما طلعت كنت بفتح القميص أوي ومتأثر بأحمد رمزي، ناس قالت لي بلاش عشان ولادنا بيعملوا زيك فبطلتها، وغيّرت الموضوع.