مايان السيد : تعرضت للتنمر وأنا صغيرة فى المدرسة عشان كنت هادية وحلمي أقابل الرئيس السيسى

كشفت مايان السيد عن كواليس دورها في حكاية حلم حياتي من مسلسل إلا أنا، الذي يعرض حاليا علي Dmc، وذلك خلال مداخلة هاتفية لبرنامج السفيرة عزيزة، مع سناء منصور، جاسمين طه، شيرين عفت، نهى عبد العزيز، رضوى حسن، وسالي شاهين.

وقالت مايان : قبل ما يجي لي الدور، كنت سمعت عن مسلسل the good doctor، بس ماتفرجتش عليه، وسمعت عن التوحد، بس ما كنتش عارفة تفاصيل، ولا عارفة ليه السلوك ده.

وأضافت : أنا جالي الدور من سنة، من شركة إنتاج Aroma، وأنا بحب مسلسل إلا أنا، وكل الحكايات بتاعته، فاتحمست جدا، وقالوا لي هتكون الحكاية عن بنت عندها توحد، وأنا بحب أعمل الحاجات الصعبة اللي فيها مخاطرة وتحدي، علشان بتطلع مني حاجة أنا ماعرفهاش.

وتابعت مايان : قبل ما نبدأ تصوير بأسبوع قابلت أستاذة ياسمين المخرجة، ودي أول مرة أتعامل معاها، وكان فيه بينا تواصل وكنت حاسة إحساس مختلف، وكانت فاهماني، وقالت لي ما تقلقيش وأي حاجة حابة تعرفيها أنا هقولها لك، وهنقابل بنت إسمها ميريام علاء، عندها توحد.

وإستكملت مايان : ميريام بنت ذكية جدا، ولذيذة أوي، عندها مواهب كتير، بتحب التمثيل، وبتغني، وصوتها رائع، كمان بتقلد المطربين اللي بتحبهم، عندها صعوبة في التواصل البصري، وقريبة جدا من أهلها، إجتماعية جدا أول ما شافتني حضنتني وبقت تتكلم معايا، ساعات مش بتفهم حاجات، بس مامتها بتفهمها، نفس تفاصيل خديجة بالظبط .

وتطرقت مايان للحديث عن التنمر حيث قالت : التنمر مش لحد بس عنده توحد أو اضطراب، لكنه بيحصل لكل الناس، أنا كمان تعرضت للتنمر فى المدرسة وأنا صغيرة لمجرد إني كنت طفلة هادية، ودي حاجة منتشرة جدا.

واختتمت مايان كلامها برسالة : عايزة أشكر المخرجة ياسمين أحمد، على مجهودها معايا وقلبها على المشروع أوي وبجد كانت عايزة توصله للناس بإحساس وتفاصيل، وعندي حلم إني أقابل الرئيس السيسي.