شيرين عبدالوهاب : حلقت شعري عقابًا لنفسي ولسه بحب حسام حبيب وعاوزه أعيش مع راجل يصرف على بيته

مازالت شيرين عبدالوهاب تتصدر السوشيال ميديا، بعد الإعلان رسميًا عن انفصالها منذ أيام، قبل أن تطل وهي حليقة الشعر في حفلها الأخير أمس في أبو ظبي، الأمر الذي صدم جمهورها من هذه الإطلالة الغريبة التي لم يعتدها جمهورها عليها.

وقالت شيرين، منذ قليل، في اتصال هاتفي مع برنامج الحكاية، الذي يقدمه عمرو أديب على قناة mbc مصر : نزلت شغلي علشان بناتي يشوفوني كده أنا عندي عدم اتزان مش مرض نفسي، وتابعت : أنا عملت كده علشان مبقاش حلوة في عينيه، وقصيت شعري قبل الطلاق بيوم واحد، ودي مش أول مرة أقص شعري، ولما الناس قبل كده اتهموني إني أسأت للبلد كنت أعاني نفسيًا وقتها والناس زودت جرحي، والأستاذ هاني شاكر موقفش جنبي، والناس لما شافتني من غير شعري البنات قالولي أنتي قويتينا.

وأضافت : الفكرة جاتلي من أبويا لما كان بيتضايق كان بيعمل كده، وانا اللي حلقت لنفسي، وبعدين جبت حد ظبطلي شعري، وعن الشئ الذي أوصلها لهذه المرحلة قالت : الإنسان الحساس بيعاقب نفسه كتير، وأنا قصرت في حق نفسي، وعاقبت نفسي بكده، وأنا محتاجة إحتواء الناس ليا وأنا بتعالج عند الدكتور محمود مرسي، منذ ولادة بناتي بسبب الوسواس القهري.

وأضافت : على فكرة أنا لسه بحب حسام حبيب، وعلشان أرجعله الموضوع محتاج معجزة، ومن وجهة نظري الراجل لازم يفضل راجل حتى لو بيكسب 10 جنيه والست تفضل ست حتى لو بتكسب 2 مليون جنيه، وممكن أعيش مع راجل لو سواق بيكسب 10 جنيه بس يصرف على بيته.