سمير صبري : نيللي رجعتنى 40 سنة لورا ونسيت مرضي لما شوفتها
أعرب الفنان الكبير سمير صبري، عن سعادته بتسليم النجمة الكبيرة نيللي جائزة الهرم الذهبي في مهرجان القاهرة السينمائي الدولي في دورته الـ43.
وقال سمير صبري خلال مداخلة مع الإعلامى محمد الباز ببرنامج آخر النهار على قناة النهار : أنا داخل المسرح وأنا عندي إصابة في ركبتي وتعبان، ومش عارف هتحرك إزاي علي المسرح، ولكن أول ما شفت نيللي فجأة لقيت نفسى نسيت التعب والمرض، وحسيت إن عندى 20 سنة وكأننا في فيلم أهلا يا كابتن.
وأضاف : دور الشرير الذى اختارته نيللى في عذاب امرأة خير دليل على قدرتها على إختيار وتقمص الأدوار، بعيدا عن الفوازير وهى حقيقي فنانة عاشقة للمهنة وبتحضر قبل موعد التصوير بساعتين دايما، وبتيجى حافظة الحوار، ودي حاجات مش بنشوفها دلوقتى.
وتابع : أنا عاصرت المهرجان وهو ما زال فكرة في خيال كمال الملاخ وكنا في بيت عبد الحليم حافظ، وهو بيقول معقولة إسرائيل هتعمل مهرجان سينمائى والقاهرة لا، ورد عبد الحليم قاله وإيه المشكلة قاله فلوس، فقررعبد الحليم التبرع بـ أجر 3 حفلات، ولأن نجوى فؤاد كانت زوجة لمديرأحد الفنادق، حصلنا علي 50 غرفة لنجوم المهرجان، وحضر المهرجان وقتها عدد كبير من نجوم العالم.
